Network
GALURA -Taun 1681 kakawasaan Verenigde Oost Compagne (VOC), ku urang Sunda disebut Kumpeni geus tepi ka Cirebon jeung Banten. VOC teh gabungan pausahaan-pausahaan dagang Walanda dina perdagangan di Hindia Timur (Nusantara).
Lantaran geus dikawasa ku VOC atawa Kumpeni nu ngawasa perdangan di Nusantara (Hindia Timur), Cirebon teh geus lain karajaan deui jiga memehna. Sanajan kakawasaan sultan masih tetep aya, ngan tetela ukur sesebutan wungkul.
Tanggal 31 Desember 1799 Kumpeni atawa VOC anu ngamonopoli dagang di Hindia Timur, bubar sarta masrahkeun Nusantara ka pamarentah Karajaan Walanda, kakawasaan sultan Cirebon teh beuki leungit taya tapakna.
Baca Juga: Putri Anjungsari (31), Anjog ka Pameuntasan Citarum, Bena Lengiteun Laratan Putri Anjungsari
Ari memehna Kumpeni mah kapentinganana urusan dagang, ari Karajaan Walanda mah ditambah ku urusan pulitik. Di Nusantara Karajaan Walanda ngadegkeun pamarentah Hinda Walanda nu dipimpin ku gubernur jendral.
Gubernur Jenderal HW Daendles (1808-1811), nyabut kakawasaan kasultanan ku wangun pamarentahan anyar dumasar sistim landdrostambt atawa karesidenan.
Kasultanan Cirebon robah jadi Cheribonsche Preanger Regentschappen nu ngawengku wilayah Limbangan, Sukapura jeung Galuh.
Dina waktu eta pisan Kasultanan Cirebon dibagi jadi dua:Kasultanan Cirebon jeung Gebang nu diparentah ku 3 sultan: Sultan Kasepuhan, Sultan Kanoman jeung Sultan Kacirebonan.
Baca Juga: Sistematika Naskah Pangeran Wangsakerta teu Beda jeung Karya Tulis Ilmiah Jaman Ayeu
Sanajan statusna tetep make sebutan sultan, tapi ieu 3 sultan teh teu mibanda kakawasaan nanaon sabab ukur pagawe staf kolonial. Hal ieu pisan nu matak nimbulkeun amarah ka rahayat di tatar Cirebon mangsa eta.
Kaasup ulama Desa Depok Blandong, Rajagaluh: Ki Bagus Rangin nu gede pisan pangaruhna. Ki Bagus Rangin teh ulama masagi nu luhung elmuna jeung gede komarana. Pangaruh Bagus Rangin lain ukur di Bantarjati tapi oge di wewengkon sejenna.
Taun 1832 pamarentahan karajaan Inggris di Nusantara nu digupernuran ku Stanford Raffles masrahkeun deui Nusantara ka pamarentahan Karajaan Walanda. Pamarentah Hindia Walanda di Nusantara dihirupkeun deui.
Nyeueung kitu, para ulama di Bantarjati Kabupaten Majalengka menta ka Sultan Kasepuhan supaya Cirebon misahkeun maneh ti Pamarentah Hinda-Belanda.
Baca Juga: Di Museum Negeri Sri Baduga Naskah Pangeran Wangsakerta Aya Opat Seri Sejarah
“Kita hamo teuing tunduk ka Kumpeni, rahayat kita sangsara taya kendatna. Lantaran tanah urang dijajah ku Kumpeni. Sultan kudu incah ti Kumpeni mun hayang nulungan rayatna.”
Kitu ambekna Bagus Rangin waktu menta ka sultan sangkan Kasepuhan pisah ti Walanda.
Urang Nusantara, kaasup urang Sunda harita najan Kumpeni atawa VOC geus bubar sarta Nusantara dicangking ku Hindia Walanda angger wae nyebut ka Walanda teh Kumpeni.
Tangtu wae pamaredih Bagus Rangin jeung para ulama sejenna henteu ditedunan ku sultan Cirebon.***
