Network
GALURA -Babad Cirebon nyaritakeun Prabu Cakraningrat, raja Karajaan Rajagaluh nu hese ditalukeunana ku Cirebon. Pikeun nalukeunana Cirebon kudu nyieun reka perdaya.
Ku lantaran Babad Cirebon dianggap lain sumber sejarah, dianggap dongeng atawa legenda, pedaran ngeunaan Karajaan Rajagaluh jaman Prabu Cakraningrat teu dijadikeun bukti kungsi ngadegna Karajaan Rajagaluh teh pakta sajarah.
Babad Cirebon, kaasup pedaran ngeunaan Karajaan Rajagaluh jeung Prabu Cakraningrat, tetep dianggap lain pedaran sejarah, najan nu dicaritakeunana nyabit-nyabit fakta-fakta sejarah.
Baca Juga: Karajaan Ragaluh nu Diadegkeun ku Dewa Niskala, ceuk Kuncen Leuweung Prabu Siliwangi, Lain Dongeng
Sumber sejenna salian ti Babad Cirebon aya urang Rajagaluh nu bogaeun naskah daun lontar nu make aksara Sunda kuna, ngan ku sabab teu diteundeun sakumaha mistina, daun lontarna teh ruksak, bubuk.
Nu bogana oge teu bisaeun macana, tapi ari kana eusina mah apaleun. Uyutna, akina, jeung bapana mindeng ngadadarkeun maksud tulisan dina daun lontar. Lain hartina luluhurna bisaeun maca aksara eta daun lontar.
Jigana, uyutna, akina jeung bapana oge ukur ngadenge ti luluhurna. Lain meunang maca. Terus ditepikeun deui ka entragan saterusna. Waktu daun lontarna masih keneh beleger mah, ari keur ngariwayatkeun Karajaan Rajagaluh teh sok bari mukaan daun lontarna.
Ceuk eta daun lontar, Karajaan Rajagaluh diadegkeun ku Prabu Dewa Niskala, seuweu (anak) Prabu Wastukancana, raja Sunda nu puseur karajaanana di Kawali Ciamis.
Baca Juga: Cianjur Kungsi Jadi Puseur Kopi di Priangan Nalika Dipupuhuan ku Bupati Aria Wiratanu
Taun 1482, Dewa Niskala ngecagkeun kalungguhanana lantaran geus ngarempak purbajati purbatisti (norma, tetekon) kasundaan: ngawin ka putri Majapahit nu geus boga tunangan.
Karajaanana, Karajaan Galuh Pakuan, puseur dayeuhna di Kawali, dipasrahkeun ka seuweuna, Jaya Dewata atawa Pamanahrasa. Dewa Niskala saterus lunta ti Kawali.
Dina waktu nu sarua, Prabu Susuk Tunggal, mitoha Jaya Dewata nu nyekel Karajaan Sunda, puseur dayeuhna di Pajajaran (Bogor), oge masrahkeun karajaanana ka mintantuna.
Ku Jaya Dewata, dua karajaan, Sunda jeug Galuh dihijikeun deui kawas jaman akina, kawas jaman Prabu Niskala Wastukancana. Puseur karajaanan dipindahkeun ka Pajajaran.
Dewa Niskala saterusna dumuk di patempatan nu kiwari disebut Leuweung Pajajaran atawa Leuweung Prabu Siliwangi nu ayeuna mah asup ka Desa Pajajar, Kecamatan Rajagaluh Kabupaten Majalengka.
Di dinya Dewa Niskala ngadegkeun Karajaan Rajagaluh, ngan sateruna dihianat ku pamajikanana nu asalna ti Majapahit tea nu jeung rombonganana ngungsi ka Kawali nyingkahan perang Paregreg.
Hanjakal pedaran daun lontar bieu ukur tepi ka palastrana Dewa Niskala, teu dicaturkeun saha nu nuluykeun Karajan Rajagaluh. Ngeunaan Karjaan Rajagaluh dipedar ku Babad Cirebon nu nyaritakeun Prabu Cakraningrat hese ditalukeunana.***
