GALURA -Sacara administratif Curug Cipanji kaereh ka Desa Tenjolaya, Kecamatan Pasirjambu, Kabupaten Bandung, Jawa Barat. Jarak ti Kota Bandung, puseur dayeuh Provinsi Jawa Barat, sakira35 kilometer.
Pikeun ngajugjug ka Curug Cipanji, ti Kota Bandung ka Soreang, puseur dayeuh Kabupaten Bandung, terus make jalan nu ka Ciwidey. Samemeh Ciwidey, ti lebah Rumah Makan Sindang Reret mengkol ka Desa Tenjolaya, Kecamatan Cijambu.
Pas gapura Desa Tenjolaya mengkol ka beulah katuhu terus nepi ka tungtung jalan anu brasna ka Pasir Eurih, pakebonan enteh nu aya Kecamatan Cijambu, Kabupaten Bandung. Ti dinya bakal nyorang jalan tarahal kurang leuwih 100 meter. Tuluy manggih padumuk tempat nitipkeun kendaraan.
Baca Juga: Ngalanglang Raksa Bumi di Kecamatan Kawali, Kabupaten Ciamis; Riksa jeung Jaga Alam
Ti dinya mah badarat ngaliwatan kebon enteh jeung nyorang leuweung pines.
Jarak ti tempat panitipan kendaraan ka lokasi kurang leuwih dua kilometer meakkeun waktu 1 jam, jalanna nanjak mudun.
Mun rek ulin ka Curug Cipanji ulah keur usum hujan. Hadena antara bulan Mei - Agustus. Ari usum halodo mah jalanna teu laleueur.
Sapanjang lumampah ngajugjug lokasi Curug Cipanji hawana estu karasa seger. Angin ngahiliwir nebak tatangkalan. Manuk ricit luhur dahan, monyet pating guntayang luhur kakayon. Sora cai walungan kadenge seah.
Piknik ka Curug Cipanji hadena dina waktu libur. Ambeh haneuteun sabab dina poe-poe biasa mah arang nu ngalanto ka dinya.
Baca Juga: Warga Korban Lini di Kabupaten Cianjur Miharep Bantuan Modal ti Paguyuban Pasundan
Dina sela-sela lumampah, selang satengah perjalanan, urang bisa istirahat di warung ngadon jajan bari ngareureuhkeun kacape.
Curug Cipanji teh aya opatna. Anu sok biasa dideugdeug mah ukur 3 curug, sabab keur ngahontal curug sejena jalana kawilang tarahal, rembet ku kakayon jarang kasaba ku jalma.
Di Curug anu katilu, anu luhurna 25 meteran, urang bisa ngadon selfi bari tanggah ningali cai anu ngeprul turun ti luhur gunung. Dina tangkal kai monyet pating guntayang.
Mun geus sakali piknik ka Curug Cipanji pasti bakal deudeuieun. Sakumaha anu kaalaman ku Faisal (26 taun),urang Sukabumi. Inyana geus genep kali piknik ka Curug Cipanji. Lima kali waktu keur masih bubujangan, sakali jeung anak pamajikan.
"Kapungkur lima kali piknik kadieu teh waktos masih bubujangan,sareng rerencangan.Ayeuna mah piknik kadieu teh sareng pun bojo,sareng pun anak," ceuk Faisal, urang Bandung anu kiwari mangkuk di Sukabumi ngadon ngumbara nuturkeun pamajikan.
Baca Juga: Karamat Gunung Cupu di Desa Nagarajaya Kecamatan Panawangan Kabupaten Ciamis
Nu ngadon piknik ka Curug Cipanji lain wae nonoman."Tadi ti rorompok miang teh tabuh 10. Hoyong terang sapertos kumaha Curug Cipanji. Sakantenan olahraga, nyoba awak, apa kiat keneh ieu salira lumampah naek turun gunung," ceuk Ahmad (60 taun), asal Soreang.
Harita ka Curug Cipanji bareng jeung abrulan wisatawan asal ti Jalan Kopo Bandung. "Ibu mah nembean," ceuk awewe tengah tuwuh. Najan kakara, inyana resepeun piknik ka Curug Cipanji teh sabab alamna endah jeung hawana seger.
Pamarentah Desa Tenjolaya gede pisan karep hayang ngokolakeun Curug Cipanji pikeun dijadikeun tempat pariwisata. Ngan ceuk Kades loba hal anu perelu jadi pamikiran pakait jeung nu ngarana ngokolakeun wisata Curug Cipanji.
“Nu mawi dugi ka danget ieu teu acan dibetuskeun atanapi diajengkeun kanggo dijantenkeun tempat wisata", cek Kades Tenjolaya ngaliwatan WhatsApp.*** Lili Guntur