Network
GALURA. Wisata Religi Samida. Kitu nu dikembangkeun ku Desa Sirnajaya, Kecamatan Rajadesa, Kabupaten Ciamis, Jawa Barat, nu rencanana mah diresmikeun bulan April 2023, sabada lebaran.
Salasaurang tokoh masarakat Desa Sirnajaya nu dipercaya ngokolakeun Wisata Religi Samida, Haris, pangsiunan guru SD, nyebutkeun di Desa Sirnajaya aya situs sejarah nu dingaranan Situs Samida.
Wisata Religi Samida nu dikembangkeun ku Desa Sirnajaya, teu jauh ti Situs Samida. Wisata Religi Samida paeunteung-eunteung jeung situs Samida, kaliwatan ku jalan nu sarua.
Hasil panalungtikan Balai Arkeologi (Balar) Bandung nembongkeun situs Samida teh titinggal jama prasejarah jeung jaman sejarah. Di Situs Samida aya pundek berundak tina batu, punden berundak teh titinggal jaman prasejarah.
Ari titinggal jaman sejarahna di situs Samida tina hasil ekskavasi Balar Bandung kapanggih lebur nu umurna geus ratusan taun. Kapanggihna lebu nandakeun jaman Hindu Budha. Lebu di situs Samida tadina urut ngaduruk layon.
Dina kamus basa Sunda kuna jeung dina kamus basa Sunda, harti Samida teh tempat meuleum layon, tempat pembakaran mayat nu nandakeun titinggal jaman sejarah.
Naha geuning dikembangkeunana Wisata Religi Samida apan Situs Samida mah titinggal jaman prasejarah jeung jaman sejarah? Padahal di Kecamatan Rajadesa rea pasantren, sarta santrina daratang ti mamana.
"Di lelewek situs Samida aya makam tokoh nu nyebarkeun agama Islam di Kecamatan Rajadesa jeung sabudeureunana, namina Wira Mantri. Tina kituna nu dikembangkeunana wisata religi," ceuk Haris.
