GALURA -Ponpes Al-Mizan Jatiwangi, Majalengka, dianjangan ku Syekh Prof Dr Yusri Rusydi Gabr Al-Hasani ti Mesir, Saptu (25/02/2023). Nganjangna ieu tokoh Syech Al Azhar Mesir nu oge Thoriqoh Yusriyyah Shiddiqiyyah Syadziliyyah Mesir dipapag langsung ku pangasuh Ponpes Al Mizan KH Maman Imanulhaq.
"Kawilang barokah sareng panghormatan nu ageung kangge kulawargi ageung Ponpes Al Mizan Jatiwangi didongkapan ku Syekh Prof Dr Yusri Rusydi nu mibanda pangaruh ageung nu jumlah jamaahna kawilang ageung di alam dunya," ceuk KH Maman Imanulhaq.
Euyeub papagon nu ditepikeun Syekh Prof Dr Yusri Rusydi hususna ka sakumna guru katut santri Ponpes Al Mizan di hiji majelis nu digelar di padumukan KH Maman Imanulhaq.
Baca Juga: Desa Budaya Desa Nunuk Baru, Desa Anyar tapi Heubeul di Kabupaten Majalengka
Syekh Prof Dr Yusri Rusydi nyebutkeun ngatik umat di zaman kiwari teh tugas nu kawilang agung, ganjaranana mibanda darajat nu luhung: hiji kamulyaan nu taya tandingna .
"Saurang guru masihan atikan elmu agamana nyaeta ku niatan masihan papagon, nu mana saur Baginda Rasululloh SAW, agama teh papagon, di antawisna buktos nasehat teh maparinan papagon ka murid-murid," kitu ceuk Syekh Prof Dr Yusri Rusydi.
Syekh Prof Dr Yusri Rusydi mapatah ka sakumna santri Ponpes Al Mizan pikeun ngajaga ahlak. Ieu guru besar ahli bedah teh ngingetan deui ulah nepi ka urang tigebrus miluan fitnah dajjal: manusa nu hayang nyumponan kahayangna teu paduli halal haramna.
Islam, ceuk Syekh Prof Dr Yusri Rusydi, teu nyaram umatna hayang beunghar. Umat Islam hayang jadi jelema nu nanjung, tarekahna ngumpulkeun harta kudu saluyu jeung syariat.
Baca Juga: Layang Salaka Domas ti Jagat Jabaning Langit
Mun urang hayang nyumponan syahwatna kudu ku cara nikah, lain ku cara lianna nu kaluar ti papagon agama. "Di antawis ciciren jalmi nu ngagaduhan iman: jalmi nu sayaktosna ngajagi auratna," ceuk Syekh Prof Dr Yusri Rusydi.
Anjeunna meupeujeuhan ka sakumna santri Ponpes Al Mizan sangkan ngokolakeun waktu nu dipibanda ku urang sahade-hadena. Dina hakekatna waktu teh hal penting, ulah nepi ka waktu loba dimomorekeun pikeun aktivitas nu taya mangpaatna.
Syekh Prof Dr Yusri Rusydi netelakeun Rasululloh SAW dina waktu nu kawilang singget mampuh ngarobah dunya. Ieu tanda Baginda Rasululloh SAW henteu ngamomorekeun waktu.
Syekh Prof Dr Yusri Rusydi teh Mursyid Tarekat Syadziliyyah di Mesir hiji dokter nu unggal poena ngubaran nu garering, lain saukur diuk di jero masjid.
Baca Juga: Anis Jatisunda: Dina Agama Sunda Pajajaran Aya Sadat Sunda
Anjeunna lain ngan saukur dokter biasa, akademikus, guru besar ahli bedah. Padumukanna kawilang mewah, hartana bru di juru bro di panto ngalayah di tengah imah. Tapi anjeunna oge sufi nu taat dina ibadah
Syekh Prof Dr Yusri Rusydi mibanda nasab nu kawilang mulya. Nasab anjeunna nepi ka Hasan bin Ali, putuna Rasululloh SAW. Anjeunna nganut Sunni mazhab Asy`ari, dina fikih mazhabna Syafi`i.*** Ayank R Sambara