Network
“NYAKSENI, Perebu,” ceuk sarerea saur manuk.
“Kula teu ngalarang daria pindah ageman da ari ageman mah kumaha hate. Ngan Pajajaran tetep kudu digedurkeun jeung teu megatkeun baraya, duduluran,” ceuk Maharaja Sakti.
“Nyakseni,” tembal sarerea.
“Kawas Aki Uha, ayeuna geus pindah ageman, tapi angger wae sakitu gumatina ka Pajajaran.”
“Ke, Perebu, ari Aki Uha teh saha?” ceuk Olot Kaya asa kajalanan.
Ti barang nganjang ka imah Aki Uha, Olot Kaya panasaraneun hayang apaleun saha ari Aki Uha pedah dina lentongna kadenge lentong urang Pajajaran. Rek nanyakeun teu kaburu lantaran Aki Uha sapoe jeput di huma, peutingna Putri Anjungsari ngajak buru-buru miang deui.
“Waktu kami lunta ti Pakuan Pajajaran, inyana sarimbit milu jeung kami. Ku urang Kawali sina cicing di tempat ayeuna. Seuweu Aki Uha nu cikal perjurit Pajajaran, waktu kami miang mah masih keneh aya. Aki Uha oge tadina perjurit Pajajaran.”
“Paingan atuh haseup nu ngelun tina imahna kahartieun ku Putri, Perebu.”
“Eta teh ku kami diingetan, mun ngajak nyimpang ka urang Pajajaran, bere tanda ku haseup.”
