Network
GALURA.CO.ID -Pamarentah Kabupaten Bandung ngayakeun Bazar Ramadhn 1445 Hijriah. jeung Operasi Pasar Murah Bersubsidi taun 2024, pikeun ngabantu masarakat nu sumebar di 31 kecamatan di Kabupaten Bandung.
Ieu kagiatan ieu ogè minangka runtuyan milangakala ka-383 Kabupaten Bandung taun 2024.
Kagiatan dibuka Bupati Bandung HM. Dadang Supriatna dibarengan Bunda Bedas nu ogè Ketua Dewan Kerajinan Nasional Daerah (Dekranasda) Kabupaten Bandung, Emma Dety, di Lapangan Upakarti Komplek Pemkab Bandung, Soreang, Senèn, 25 Maret 2024.
Dadang Supriatna miharep Bazar Romadon jeung Operasi Pasar Murah Bersubsidi bisa nyetabilkeun inflasi di Kabupaten Bandung.
Baca Juga: Tarling di Masjid Besar Pangalengan Bupati Bandung: Ngamulyakeun Ulama, PAD Ngaronjat
"Biasana, nyanghareupan Idulfitri pangaos sembako undak. Tapi, simkuring maos warta tadi enjing-ènjing Menteri Perdagangan tos masihan gambaran wirèh harga sembako secara nasional relatif stabil sareng lungsur," ceuk Dadang Supriatna.
Dadang balaka, keur mempertahankeun inflasi, aya sababaraha hal nu dilakukeun Pemkab Bandung lebah dieu Dinas Perdagangan dan Perindustrian Kabupaten Bandung. Di antarana ngayakeun Bazar Romadon.
Iwal ti kitu pangayaan paket sembako sajumlah 10.990 paket keur sembako bersubdisi. "Pangaosna nu sakedahna sapaket Rp 170.900, ku disubsidi Pemkab Bandung, saharkat Rp 73.000," pokna.
Dadang nyebutkeun sajumlah 10.990 urang KPM (Keluarga Penerima Manfaat) nyaèta nu geus kadaftar di sèwang-sèwang kecamatan, sacara simbolis dipasrahkeun ka 4 kecamatan.
