Mapag Ramadan 1444 H di Baitun Nidzom, Tumuwuhkeun Silipikanyaah ka Sasama

GALURA - Acara Mapag Ramadan 1444 H di Ponpes Baitun Nidzom Al Islami lumangsung poé Ahad, 19 Maret 2023.

Kalawan tema "Menyambut Rahmat dan Magfiroh Allah Dengan Cara Menebar Kasih Sayang dan Saling Memaafkan Antar Sesama", prungna acara téh dimimitian ti bada lohor.

Sakumna jamaah Baitun Nidzom Al Islami, teu kolot teu budak, ngahadiran éta acara nu ogé nguntun jeung miéling Isra Miraj atawa Rajaban.

Kalawan hidmat, sakumna jamaah teuleum macakeun solawatan, laju tawasulan jeung marhabaan, geusan ngabagéakeun Ramadan 1444 H.

Dipasieup ku rupaning kamonésan pintonan barudak santri, Grup Hadroh Hadrotunnidzom, turta tausiah ti KH Ubaidillah AB sesepuh Ponpes Roudlotul Ulum, jeung Ki Ireng Maulana ti Ponpes Darul Ihsan.

Baca Juga: Munggahan di At Taufiq Cikaso, Ngabagéakeun Ramadan 1444 H ku Solawat

Ponpes Baitun Nidzom Al Islami téh perenahna di Kampung Karangsari, Desa Cihanjuang, Kec. Parongpong, Kabupaten Bandung Barat.

Sesepuh Ponpes Baitun Nidzom Al Islami, Ustadz H Syihabudin Mahmud, nétélakeun, éta acara minangka kagiatan noron geusan mapag bulan Ramadan.

Dina prak-prakanana, teu weléh ngaubkeun sakumna warga.

Ku ayana éta acara, dipiharep mingkin ngaronjatna rasa sauyunan jeung karukunan warga.

"Ieu ge minangka sarana warga pikeun silihampura, diwuwuh ku pangajian, malar dina ngalaksanakeun puasa Ramadan taun ayeuna téh aya dina kaayaan haté nu beresih," pokna.

Ceuk Ustadz H Syihabudin Mahmud, bulan Ramadan minangka bulan mulya. Bulan nu kalintang dianti-antina ku sakumna kaom Muslim di sakuliah dunya. Jeroning bulan Ramadan, mungguh leubeut ku ajén rohmah tur magfirah Allah Swt.

Baca Juga: Hikmah Ibadah Munggah Haji Ceuk KH MD Ubaidillah AB: Napakuran Kalemahan Diri, Maheutkeun Sumanget Barjamaah

"Méh sagala amal ibadah urang dina bulan Puasa téh baris meunang ganjaran manglipet-lipet," pokna.

Tah, saméméh prung ngalakonan puasa dina bulan Ramadan, kalintang hadéna mun urang silihampura ka sasama.

Ti dinya, ogé nguniang rasa silimikanyaah ku cara sidkoh minangka wujud miduli tur kabagjaan ngalakonan puasa Ramadan.

"Muga wae urang sadaya teu weléh dipaparin kakiatan tur katawakalan geusan ngalakonan ibadah puasa Ramadan taun ayeuna kalawan meunang ajén-inajén rohmah jeung magfiroh-Na," pokna.

Tug tepi ka wanci tunggang gunung, réngsé ngaderes du'a, acara dipungkas ku balakecrakan ngararasakeun parasmanan katut idangan lianna.***

Baca Juga: Sidang Isbat Netepkeun Awal Ramadan 1444 H Digelar 22 Maret 2023