Network
GALURA.CO.ID -Singabarong, kitu ngaran kareta kancana koleksi Museum Karaton Kasepuhan Cirebon. Najan ngaranna make kecap singa, tapi taya hiji oge ornamen nu bentukna singa atawa nu ngaharib-harib bentuk singa. Sumawonna arca singa mah. Malah nu tembong teh sato nu hirup di Nusantara.
Wangun Kareta Singabarong adu manis opat sasatoan. Maung bagean awakna, sukuna, jeung matana; gajah (tulale), manuk buroq, (jangjang), jeung naga (huluna). Jadi singa mah teu dibabawa. Naon sababna eta kareta kecana dingaranan Singabarong?
Singabarong dijieun taun 571 Saka atawa 1649 Masehi, abad ka-15. Anu nyieunana Pangeran Losari, salasurang incuna Sunan Gunung Djati (SGD). Dina jamanna Singabarong ditarik ku munding bule, opat, lain ku kuda atawa sapi. Singabarong teh bisa disebutkeun kandaraan dinas Sultan Cirebon.
Kareta Singabarong nu geus make suspensina (per) teh, ceuk sakaol, lambang sosobatanana Sultan Cirebon jeung nagara India, Mesir, jeung Tiongkok. Tulale gajah nu nyapit trisula (cipta, rasa jeung karsa), ngalambangkeun India, jangjang buroq ngalambangkeun Mesir, jeung naga ngalambangkeun Tiongkok.
Singabarong mibanda opat kikiping, di hareup dua jeung di tukang dua. Kikiping hareup leuwih leutik batan kikiping tukang. Dina jamanna Singabarong digunakeun dina kirab malem 1 Suro jeung diistrenana sultan. Ti taun 1945 Singabarong tara dipake deui alatan dipikariwang ruksak. Anu ayeuna sok dipake duplikat.
Singabarong ceuk sakaol asalna tina kecap “singarani” jeung “barong”. Singarani hartina mere ngaran, ari barong hartina babarengan. Singabarong hartina babarengan mere ngaran.***
