Network
GALURA.CO.ID -Tiap taun 400 budak di Amerika Serikat (AS)tiwas katembak ku senjata api jeung 300 sejenna tatu. Di Amerika, ku akrab-akrabna barudak lalaki kana pestol, umumna kungsi barudak lalaki mah ngabogaan kaulinan pepestolan. Ngan naha budak bisa ngabedakeun pepestolan jeung pestol enyaan?
Dokotor Arthur Kellermann, direktur Center for Injury Control pada Emory University geus ngalakukeun panalungtikan pikeun ngajawab panalek tadi. Hasilna, barudak di Amerika teu bisa ngabedakeun antara pepestolan jeung pestol nu bener.
Kellermann ngalakukeun panalungtikan ka 64 budak lalaki umur dalapan nepi ka 12 taun. Eta barudak teh kolotna ngabogaan senjata api di imah. Eta budak teh dikelompokkeun jadi 29 grup, nu sagrupna duaan atawa tiluaan. Satiap grup ditinggalkeun ku kolotna di rohangan anu aya eunteung keur mikanyaho perilaku budak tea.
Ari dina laci salian ti pepestolan, oge aya pestol enyaan. Hasilna, 48 budak atawa 72 persen budak bisa nimukeun senjata bener. Tina sakitu lobana budak, umumna eta senjata teh langsung ditodongkeun ka babaturanana nurutan gaya jagoan dina televisi. Ngan saurang anu sanggeus nimukeun senjata asli ngalaporkeun ka kolotna.
Di Indonesia, kajadian kitu teh jigana rada pamohalan. Sabab apan senjata dipahing dipimilik ku saha bae ari teu boga idin ti nu wajib mah.
Tapi dina taun 2000, aya nu rada sarimbag kajadian kacilakaan ku pepestolan ieu mah. Harita pepestolan nu pelorna sagede kacang hejo geus ngabalukarkeun sababaraha budak jadi lolong. Barudak teh biasana ngalakukeun peperangan niru-niru jagoan dina televisi.
Nurutkeun data di rumah sakit Cicendo harita, teu kurang ti 59 budak nu uubar ka eta rumah sakit akibat pepestolan buatan Cina teh. Encan anu berobat jalan jeung dirawat di rumah sakit lianna, bisa nepi ka ratusan jumlahna.
Sabagian pasen di Cicendo kudu oprasi sabab ayana getih anu numpuk dina kongkolak panon braudak tea. Aya oge anu kudu dikaput sabab kornea matana soek.
Sabenerna dina label plastik pepestolan teh aya tulisan dina basa Inggris do not shoot at human and animal. Tapi tangtuna oge teu sakabeh budak ngarti kana eta panyaram. Ku kituna jigana nya kolot atawa guruna kudu rada ati-ati sabab barudak mah can apal kumaha balukarna tina kajadian eta teh.***Jagat Pramudita
