Network
GALURA.CO.ID -Sajarah antara Indonesia jeung Walanda geus lumangsung mangabad-abad lilana, sarta nyesakeun carita tina rupa-rupa kajadian dina mangsa harita boh sacara sosial, politik, boh ekonomi. Lara jeung bagja, terus ngaguluyur nyieun caritana sorangan salila mangtaun-taun. Nepi ka teu karasa ngajadikeun hubungan anu kacida raketna dina DNA kadua nagara.
Jeung teu saeutik anu terus ngabangun iketan kulawarga ku perkawinan, alhasil dua getih sejen bangsa ieu pacampur jadi hiji. Titinggal jeung tapak budaya ieu dua bangsa ge bisa kapanggih dina bentuk bahasa, arsitektur, kuliner, jeung aspek sosial lianna.
Tah pikeun ngaraketkeun hubungan dua Nagara, Tim Art in Motion (AiM) Walanda, sawatara waktu kaliwat geus ngayakeun lokakarya intensif di ISBI Bandung, tanggal 19 - 20 Februari 2024. Kagiatan ieu mangrupa awal nu penting pikeun hubungan kreatip jeung budaya anu bakal ngaraketkeun hubungan antara Indonesia jeung Walanda dina taun 2024 jeung 2025.
Tilu urang pengajar (Rob Hammink, Ronald van de Cappelle dan Quirine van Heeren) ngahajakeun datang ti Walanda pikeun nyileman mangsa bihari, kiwari, jeung nu utama nyawang mangsa hareup kadua nagara, babarengan jeung para mahasiswa akademi seni Indonesia, salah sahijina jeung mahasiswa ISBI Bandung.
Ku sagala pangaweruhna, para mahasiswa bakal mimiti digawe jeung nyiptakeun hiji karya seni anu baris diniley ku juri dina tanggal 8 Maret 2024. Pinunjulna bakal meunang hadiah mangrupa uang saku bekel miang ka Walanda bulan September 2024 nepi ka November 2024. Para mahasiswa di Nagara Kincir Angin bakal jadi duta budaya jeung bakal reureujeungan nyieun karya seni jeung mahasiswa Walanda. Karya seni anu bakal jadi simbul nu kuat pikeun mangsa hareup anu raharja.
Sakumaha anu pada terang, Rob Hammink, panaratas AiM teh Panulis (diantarana novel Jodoh), reporter senior internasional De Telegraaf jeung kungsi maen dina film Bumi Manusia karya Pramoedya Ananta Toer.
Hammink kaget nilik sikep Indonesia jeung Walanda dina nyurahan mangsa heubeul nu sarua. "Indonesia teh nagara ngora seger keneh anu keur bagerak maju kacida cepetna . Nagara anu keur sumedeng mekar. Standar hirup ge undak. Di Walanda, nilik deui ka mangsa bihari boga tujuan nu mandiri. Maranehna anu nyawang ka tukang ku hideung-bodas, moal ningali warna-warna dina mangsa hareupna. Seni teh cara ampuh keur nyieun pernyataan ku cara nu lemes," kitu ceuk Hammink.
Kick-off AiM bakal dimimitian awal tahun ieu di Bandung, sarta AiM bakal diluncurkan di sakuliah Indonesia, mimiti ti Aceh nepi Papua anu bakal lumangsung nepi ka taun 2025, nalika Indonesia mileing 80 taun kamerdekaanana.
Proyek seni ieu dirojong ku Atase Pendidikan dan Kebudayaan Kedutaan Besar Republik Indonesia di Den Haag, ISBI Bandung, BKS PTSI, jeung Erasmus House di Jakarta.
