Network
GALURA.CO.ID -Sultan Ki Ageng Danalaya anu kungsi mingpin Kasultanan Cirebon di abad XVII Maséhi anu nyiptakeun kasenian jaran lumping (kuda lumping) téh. Ieu kasenian anu diciptakeunana diancokeun pikeun ngahibur kulawarga, masarakat, jeung ngahibur sémah anu daratang ka karaton.
Baréto mah jaran lumping téh disebutna seni jaran birahi. Birahi ngandung harti kasmaran marining Pangérané (kudu éling ka Pangeran). Jadi masarakat atawa sémah karaton anu dihibur ku jaran lumping kudu aréling. Montong milampah pagawéan dosa jeung kudu getol ibadah ka Pangéran.
Ku kituna dina pagelaran jaran lumping sok maké kukudaan anu dijieun tina kulit munding. Ditumpakan, bari nu tumpakna parigel nari, silat jeung gugulingan dina luhureun taneuh. Pirigan gamelanana waditarana di antarana kendang atawa dog-dog, kenong, kebluk, kening, kocrék, jeung goong.
Baca Juga: Dunya Usaha di Urang Kalindih ku Produk Luar Kitu Ceuk Longser Bandung Mooi
Pingpinan jaran lumping disebutna malandang, purah ngariksa bisi pamaén kuda lumping teu aréling salila ngajalankeun atraksina. Apanan biasana pamaén kuda lumping sok kasurupan lelembut nepi ka teu éling. Tah ku malandang gancang diubaran ambéh teu katutuluyan.
Dina magelarkeun atraksina, jaran lumping sok maké gaya tari jaran belo, jaran sambrani, jaran windu sakti, jaran windu jaya, jeung jaran windu sekardiyu. Saban ganti adegan malandang sok nepikeun hartina, nyontokeun balukar jalma doraka jeung kahirupan jalma anu hadé kalakuanana.
Ka béhdieukeun jaran lumping anu baheulana kaceluk seni luhung bogana karaton téh geus teu puguh juntrungna. Jaran lumping sok diparaké ngarala duit, ngaramén ka pakampungan. Dina atraksina gé geus teu pararuguh, malah teu saeutik nu sok dibarengan jeung mabok-mabokan.
Lalajo jaran lumping matak resep. Nu dipikareueus lain dina widang kaparigelan senina, tapi dina kawedukanana. Padahal mah baheulana jaran lumping mah tara dipasieup ku atraksi kawedukan kawas jaran lumping kiwari.
Dina atraksina jaran lumping sok magelarkeun nu ahéng-ahéng, saperti ngadahar jukut kawas kuda enyaan, mesék cangkang kalapa ku sungut, neureuy beling, nginum cai kolombéran, dipecutan sataker kebek, jeung rea-rea deui.
