Network
GALURA.CO.ID -Salila taun 2023, pelukis R Cahyadi aub dina 20 kagiatan nu patali jeung karya lukis. Boh pamèran di jero kota boh di luar kota, samalah di luar nagri.
Salila taun 2023 ogè, R Cahyadi geus nyieun 50 karya jeung souveniran. Di antara 50 lukisan karyana, Kota Tua bisa disebut karya pamungkas di taun 2023, karya nu mibanda kesan mandiri.
Disebut kitu tèh, ceuk ieu pangasuh Komunitas Seni Rupa Gradasi nu dumuk di wewengkon Komplek Gading Tutuka, Kecamatan Soreang Kabupaten Bandung teh, lantaran Kota Tua, lukisan ukuran 60x80 cm, mangrupa tehnik anyar dina abstractif visualisasi.
Ceuk R Cahyadi, Kota Tua di dieu lain ngaran hiji kota nu aya di kieuna. "Hartosna kota nu aya di dunya sèjèn. Ieu lukisan kanggo koleksi pribadi sareng kolektor. Media pasir laut, acrylik sareng mix media sanèsna, " ceukk R. Cahyadi via WA, Rebo 27 Desember 2023 sabab inyana keur di Garut tepi ka tanggal 30 Desember 2023.
R. Cahyadi nètèlakeun, ngagarap likisan Kota Tua kawilang rada bangga, sabab objekna dumasar panyusudan tur nèwakna secara metafisik. *** Sopandi
