Network
GALURA-Komunitas Seni Republik Sandal Jepit rukun gawe reujeung komunitas seni sejenna, rengse ngayakeun pameran lukisan karya pelukis Asep Dheny.
Eta acara anu lumangsung ti mimiti 16 nepika 18 Agustus 2023, di lelewek Cilimus Kuningan, sajaba midangkeun hasil karya lukisan Asep Dheny, pelukis urang Kuningan, oge midangkeun pagelaran seni reujeung dialog budaya deuih.
Ti antarana seni instalasi, fotografi, film, diskusi foto & film, screening film jeung dialog budaya.
Dina runtuyan eta acara, aya seniman jeung budayawan sejen aub milu ngadeudeul nyukseskeun acara.
Ti antarana wae seniman Yusup Oeblet, gitaris Pupun Kapten, Embie C. Noor jeung penari topeng Nani.
Presiden Republik Sandal Jepit, Asep Dheny, nyebutkeun pameran "Serupa - Sekata" mangrupakeun pameran tapak-tapak artistik Republik Sandal Jepit dina ngalengkah tina hiji proses kana proses sejenna.
Ceuk Asep Dheny, eta pameran teh nembongkeun karya tina karya anu kapanggih, kaimpleng jeung katalungtik, dikotretkeun ngaliwatan seni-seni kasebut.
" Lengkah teh pananya, anu kedah diwaler ku lalampahan anu tos diguratkeun dina karya nyata," ceuk Asep Dheny.***
