GALURA - Film Gita Cinta dari SMA nu dirilis 1979 kalarung, taun ieu di-remake alias dipindo-garap (difilmkeun deui) taun 2023 ku PT Kharisma Starvision Plus.
Diangkat tina novel legendaris karya Eddy D. Iskandar, ieu film nu ngangkat romansa cinta Galih jeung Ratna téh disutradaraan ku Monty Tiwa, kalayan produserna Ir. Chand Parwez Servia.
Saméméh jadi novel, Gita Cinta dari SMA téh dimuat heula sacara nyambung (carita nyambung, carnyam) di majalah Gadis.
Dina filmna nu ieu, Parwez méré penyegaran boh dina pendalaman karakter pendukung, boh dina ngagambarkeun suasana/setting Bandung taun 1984. Atuh sutradara Monty Tiwa ngagarap filmna leuwih karasa hégar tur matak narik, tapi henteu mopohokeun orisinalitas carita Galih jeung Ratna anu enya-enya geus ngalegenda.
Baca Juga: Milu Makalangan dina Serial ‘The Last of Us’, Christine Hakim Kapeto Jadi Ilmuwan Indonesia
Cita rasa heubeul dina ieu film, dijaga ogé ku cara ngeukeuhan dua lagu Chrisye anu dipidangkeun dina film aslina. Iwal ti éta téh ditambahkeun tujuh lagu anu dihaleuangkeun ku penyanyi Segara.
Dina versi heubeulna, Gita Cinta dari SMA téh karakter utamana dipaénkeun ku Rano Karno jeung Yessy Gusman, masing-masing jadi Galih Rakasiwi jeung Ratna Suminar. Dina versi remake-na taun 2023 ieu, karakter utamana téh dipaénkeun ku Prilly Latuconsina (Ratna Suminar) jeung Yesaya Abraham (Galih Rakasiwi).
Iwal ti Prilly jeung Yesaya, nu maraén dina ieu film, di antarana, Arla Ailani, Chantiq Schagerl, Abun Sungkar, Fadi Alaydrus, Putri Ayudya, Dwi Sasono, Unique Priscilla, Dewi Gita, Iyang Darmawan, jeung Candil.
Numutkeun rarancang, film Gita Cinta dari SMA téh baris diputer di bioskop-bioskop sakuliah Indonesia, ti mimiti 9 Februari 2023. Sedengkeun Gala Premiere-na bakal lumangsung poé ieu, Minggu, 5 Februari 2023, di Ciwalk, Jalan Cihampelas, Bandung.
Baca Juga: Dina Film Serial ‘The Last of Us’, Jakarta jadi Sumber Sasalad
Produser, sutradara, jeung para pamaénna gé bakal daratang ngareuah-reuah éta Gala Premiere. Kaasup nu rék datang téh Segara, penyanyi nu ngahaleuangkeun lagu téma jeung ngeusi sora Yesaya nalika ngahaleuangkeun sawatara lagu dina film. Segara, dina éta Gala Premiere, baris ngahaleuangkeun lagu-lagu nu aya dina film Gita Cinta dari SMA téa.
Saméméhna, pihak rumah produksi geus babagi poster munggaran éta film liwat akun resmi media sosial Starvision, 6 Januari 2023. Atuh trailer-na gé geus ditayangkeun liwat kanal YouTube Starvision, 9 Januari, tur geus dilalajoanan 1,5 juta tayang.
Dina acara “Press Conference Official Trailer & Poster ‘Gita Cinta dari SMA’” di Metropole XII, Jakarta Pusat (13/1/23), Prilly ngarepkeun yén film Gita Cinta dari SMA bisa ngubaran kakangen kolot-kolot urang anu mikasono film taun 80-an.
Baca Juga: Sean Idol, Geus Nyiptakeun Lagu keur Sababaraha Albumeun, ngan Niténan heula Kondisi Pasar
Dina éta konferensi pers anu ogé dihadiran ku produser, penulis novel, jeung para pamaénna téh, sutradara Monty Tiwa ngungkabkeun rasa kabungahna bisa ngagarap deui film dumasar novel Eddy D. Iskandar. Disebutkeun “ngagarap deui” téh, cenah, pédah saméméhna kungsi ogé nyieun film Roman Picisan (Rompis, 2018) anu pada-pada diangkat tina novel Eddy D. Iskandar, sarta duanana mangrupa film remake.
Monty Tiwa ngaku, ngagarap film Gita Cinta dari SMA téh jadi hiji kahormatan, lain saukur tantangan.
“Da tantangan mah, rék ngagarap film nu kumaha waé gé kana tangtu aya tantanganana. Tapi kahormatan, hésé dibalikan deui, perlu dienyakeun nalika aya kasempetan,” ceuk Monty.
Gita Cinta dari SMA téh nyaritakeun hubungan cinta rumaja SMA, Galih jeung Ratna. Hanjakal, hubungan duanana teu disatujuan ku bapana Ratna. Bapa Ratna keukeuh baé mamaksa supaya hubungan duanana henteu nuluy. Tepi ka rupa-rupa cara disorang ku bapana Ratna.
Ceuk Parwez, sakumaha novel jeung filmna nu ti heula (versi Rano Karno – Yessy Gusman), film Gita Cinta dari SMA versi Yesaya Abraham – Prilly Latuconsina gé baris dituluykeun ku film Puspa Indah Taman Hati.***
Baca Juga: Ayah Lapidin Kungsi Dijieun Naskah Oratorium jeung Dijieun Karya Tari ku Mahasiswa ISBI
Baca Juga: Ngahirupkeun deui Galih jeung Ratna, ‘Gita Cinta dari SMA’ Ngahudang ‘Baper’ nu Lalajo