GALURA.CO.ID –Dinas Pendidikan (Disdik) Kabupaten Majalengka ngagelar Workshop IKM dan Pemanfaatan PMM jenjang PAUD sakabupaten Majalengka di Gedong Islamic Center Majalengka, Kemis (29/02/2024).
Ieu workshop tarekah keur tatan-tatan jeung implementasi program Kemendikbudristek ngeunaan program Merdeka Mengajar di satuan pendidikan di Kabupaten Majalengka.
Kadisdik Kabupaten Majalengka, Dr. Hj. Lilis Yuliasih, M.Pd., netelakeun, Workshop teh runtuyan agenda Disdik Kabupaten Majalengka.
Workshop diiluan ku guru PAUD jeung Kepala PAUD sakabupaten Majalengka. Narasumberna ti sakumna pengawas anu geus dibekelan pelatihan jeung pendidikan.
“Workshop digelar minangka persiapan Disdik Kabupaten Majalengka kangge ngaimplementasikeun program Merdeka Mengajar. Dina taun 2024 program Merdeka Mengajar kedah saenggalna di implementasikeun ku sadaya dinas pendidikan," ceuk Kadisdik.
Hj.Lilis Yuliasih netelakeun dina Merdeka Mengajar salasahijina aya Program Sekolah Penggerak, keur update ngeunaan Sekolah Penggerak di Kabupaten Majalengka nepi ka kiwari geus aya 96 Sekolah Penggerak.
Sarengsena satahun ngalaksanakeun program Sekolah Penggerak, sakola kudu ngagelar desiminasi hasil karya sarta hasil karyana dijadikeun conto keur sakola lianna.
Kadua, program Guru Penggerak, di Kabupatem Majalengka, diiluan ti mimiti angkatan kadua nepi angkatan kasalapan anu jumlahna 434 Guru Penggerak. Tina 1.867 satuan Pendidikan di Kabupaten Majalengka aya 434 Guru Penggerak.
“Kangge janten Guru Penggerak teu gampil, tapi ngalangkungan sababaraha proses ti ngawitan pendaftaran, proses seleksi, dugi pendidikan, pelatihan bimbingan salami 6 sasih dugi ka ngahasilkeun karya," ceuk Bunda Kadisdik.
Pj Bupati Majalengka, Dedi Supandi, nyebutkeun dumasar data ti Badan Pusat Statistik, sahenteuna aya opat kriteria anu dijadikeun Indeks Presepsi Publik Pendidikan di Kabupaten Majalengka.
Kahiji Kabupaten Majalengka geus boga Peraturan Daerah (Perda) Pendidikan, anu Kadua Majalengka mibanda Perda Pesantren. Hiji-hijina Kabupaten anu geus boga Perda Pesantren di Jawa Barat nyaeta Kabupaten Majalengka.
Katilu komitmen Sumber Daya Manusia (SDM) struktur pendidikan di Kabupaten Majalengka kudu dieusi ku individu-individu pendidikan.
Anu Kaopat kontinuitas progres ngomean sarana prasarana pendidikan. "Ku opat faktor bieu, sim kuring yakin Kabupaten Majalengka mampuh janten Kabupaten Pendidikan," ceuk Dedi Supandi nu ceuk sawatara bakal maju dina pilkada di Kabupaten Majalengka.*** Ayank R Sambara