GALURA - Di Tatar Sunda aya sawatara kabuyutan nu meunang panangtayungan ti pamarentah sangkan teu tumpur. Hiji di antarana nyaeta Kabuyutan Ciburuy di Kabupaten Garut.
Jeung enyana Kabuyutan Ciburuy teh kaasup hiji tina sawatara cagar budaya atawa situs nu geus ditangtayungan ku Pamarentahan Provinsi Jawa Barat, nu aya di wewengkon Garut. Di sebut hiji, sabab di Garut teh, cagar budayana kawilang rea.
Perenahna, Kabuyutan Ciburuy teh, sakumaha cek tadi, aya di suku Gunung Cikuray Desa Pamalayan, Kacamatan Cigedug.
Baca Juga: Di Palabuan Karajaan Sunda, Kapal-Kapal Niaga ti Mancanagara Larsup
Kabuyutan Ciburuy lain kabuyutan samanea. Cek kolot urang dinya, di kabuyutan nu dihartikeun barang atawa tempat kuno tea, rea barang titinggal jaman Prabu Siliwangi jeung Prabu Kean Santang.
Anapon barang titinggal karuhun teh antarana, wangunan atawa imah adat nu disebut Bumi Patamon jeung Bumi Padaleman, rupa-rupa keris, goong renteng, kitab kuno nu ditulis dina lontar jeung nipah, sarta naskah Sunda kuno kawasan Amanat ti Galunggung jeun Sewaka Darma.
Eta tempat jeung barang nu aya di Kabuyutan Ciburuy, cek kolot urang dinya, teu bisa sagawayah ditincak atawa dipake. Mun aya nu ngarempak, rea nu percaya, bakal ngadatangkeun mamala.
Baca Juga: Karajaan Sunda Kagolongkeun Karajaan Agraris tapi Dideudeul ku Maritim nu Kuat
Di Kabuyutan Ciburuy, aya imah adat nu wangunna beda ti imah sejen di Garut.
Suhunanana tina injuk, ngadeg dina lahan nu kawilang lega. Ari wangunanana mirupa imah gadang di Minangkabau, Sumatera Barat.
Dua imah nu aya di Kabuyutan Ciburuy teh sakumaha disebut tadi aya nu disebut Bumi Patamon jeung Bumi Padaleman.
Bumi Patemon teh minangka tempat paranti pertemuan atawa panglawungan warga adat, pikeun nyawalakeun rupa-rupa hal. Ieu imah, disebut oge bale panglawungan, sakaligus tempat nyimpen banda pusaka.
Baca Juga: Gala Premiere-na Poé Ieu, ‘Gita Cinta dari SMA’ Difilmkeun deui bari teu Mopohokeun 'Originalitas'
Beda jeung Bumi Patamon, bumi nu hiji deui nu disebut Bumi Padaleman, minangka wangunan karamat. Iwal ti pupuhu Kabuyutan Ciburuy, saha wae teu bisa asup ka Bumi Patemon. Dina bisana ge, baheula mah kudu meunang idin heula ti pupuhu adat.
Pangna teu sagawayah jalma bisa asup, sabab di Bumi Padaleman aya rupaning banda pusaka kayaning keris, bedog, kitab buhun kaasup nu dijieunna tina daun lontar jeung nipah nu ditaksir titinggal karuhun jaman Prabu Siliwangi jeung Prabu Kean Santang tea.
Ngeunaan kitab buhun di Bumi Padaleman, jumlahna teu kurang ti 750 lambar. Ngan tina jumlah sakitu teh rereana mah geus ruksak.
Baca Juga: Angkawijaya Ngiwat Pamajikan Panembahan Ratu, Surat Talak Ditukeuran ku Sindangkasih
Kitu teh Kabuyutan Ciburuy nu aya di Garut teh. ***
Catetena : Kanggo pamaca nu panasaran keneh kana artikel Kabuyutan Ciburuy, tiasa diaos dina Galura edisi citakna, Galura No 38. Pami peryogi koranna, tiasa ngahubungi pemasaran, Kang Endang Wahyu, WA 08156044854.