Network
GALURA.CO.ID- Bupati Bandung HM Dadang Supriatna jeung Ketua TP PKK Kabupaten Bandung Hj. Emma Dety hadir di satengahing barudak yatim di Mesjid As Syifa Desa Tegalluar Kecamatan Bojongsoang Kabupaten Bandung, Saptu, 30 Maret 2024.
Dadang Supriatna jeung Emma Dety nyantun barudak yatim jeung ngadistribusikeun zakat ka warga.
Santunan, ceuk bupati, sakalian pamitan deuk miang ngalaksanakeun ibadah umrah ka Tanah Suci Mekkah, Salasa, 24 Maret 2024 peuting.
Baca Juga: Sababaraha Kali Diusulkeun Diwangun, Sasak Cikeruh Antukna Diresmikeun Bupati Bandung
Ku kituna boh Dadang Supriatna boh Emma Dety mènta doana ti masarakat pikeun kasalametan jeung kasehatanana salila ngajalankeun ibadah umrah.
Dadang ogè sasadu mènta dihampura ka masarakat nu hadir harita bisi aya salah lisan nu ditepikeun.
"Neda piduana, mugia salamet di perjalanan dugi ka Tanah Suci Mekkah Arab Saudi sareng wangsulna deui ka lembur, tetep dina kaayaan sehat sareng salamet," ceuk Dadang Supriatna.
Dadang ogè nganuhunkeun ka masarakat Kabupaten Bandung ku geus aub kana Pemilu 14 Pebruari 2024. Inyana miharep hasil Pemilu 2024 mawa kamaslahatan keur masarakat Kabupaten Bandung.
Dadang Surpiatna ogè nyosialisasikeun Pilkada serentak nasional nu bakal dilaksanakeun 27 November 2024 engkè.
