Network
GALURA.CO.ID -Ti mimiti 31 Desember 2023, Herdiat Sunarya jeung Yana D Putra purna tugas tina kalungguhan bupati jeung wakil bupati Ciamis. Aya nu nyebutkeun Herdiat Sunarya henteu nohonan janjina dina kampanye: ngaganti ngaran Kabupaten Ciamis jadi Kabupaten Galuh.
Saenyana Herdiat Sunarya henteu jangji bakal ngaganti Kabupaten Ciamis jadi Kabupaten Galuh, Inyana dina kampanyena ukur nyebutkeun bakal ngaakomodir asiprasi warga Tatar Galuh nu meredih ngaran Kabupaten Ciamis diganti jadi Kabupaten Galuh.
Sanggeus jadi bupati Ciamis tangtu wae, Herdiat Sunarya henteu ngan merhatikeun warga nu mikahayang ngaran Kabupaten Ciamis dibalikeun deui ka ngaran Kabupaten Galuh. Tapi oge kudu narima aspirasi warga Tatar Galuh nu henteu satujueun Kabupaten Ciamis jadi Kabupaten Galuh.
Baca Juga: Tokoh Agama Kawali Nolak Kabupaten Ciamis Diganti Jadi Kabupaten Galuh
Ku nengetan pihak-pihak nu mikahayang Kabupaten Ciamis diganti jadi Kabupaten Galuh, nu nolak Kabupaten Ciamis jadi Kabupaten Galuh beuki dieu beuki loba. Malah rea nu ngahaja nepungan anggota DPRD Kabupaten Ciamis nepikeun aspirasina.
“Leres, hususna ka Fraksi PKS di DPRD Kabupaten Ciamis seueur nu dongkap ngadugikeun ka teupanujuanana Kabupaten Ciamis janten Kabupaten Galuh,” ceuk Uus Rusdiana, Ketua Fraksi PKS DPRD Kabupaten Ciamis.
Anu nolak ngaran Kabupaten Ciamis jadi Kabupaten Galuh teh sarua alesanana: hariwangeun budaya atawa tradisi nu patojaiah jeung ajaran agama Islam hudang deui. Jadi lain teu satuju ka ngaran Kabupaten Galuh, tapi hariwangeun ku balukarna.
Tina kituna boh pamarentah boh DPRD Kabupaten Ciamis henteu terus ngusahakeun Kabupaten Ciamis jadi Kabupaten Galuh. “Leresan dieu, DPRD Ciamis henteu mihak ka nu pro sareng henteu mihak ka nu kontra. Anggota dewan nampi aspirasi ti nu pro sareng ti nu kontra,” pokna.
Baca Juga: Kabupaten Ciamis Diganti Jadi Kabupaten Galuh, Kawasna Moal Jadi
