Network
GALURA.CO.ID -Kaayan rumah tidak layak huni (rutilahu) dina munggaran kapamingpinan Bupati Bandung Dadang Supriatna lobana 37.000 unit. Sajalan waktu, ngomèan rutilahu nungtut nambahan, tepi ka danget ayeuna targetna 7.000 unit saban taun.
Hal ieu ditepikeun Dadang Supriatna dina Rembug Bedas ka-137 di Desa Arjasari, Kecamatan Arjasari, Kabupaten Bandung, Rebo, 19 Juni 2024.
Satutas Rembug Bedas di Desa Arjasari, Bupati Bandung neruskeun Rembug Bedas ka-138 di Desa Lebakwangi, laju Rembug Bedas ka-139 di Desa Batukarut Kecamatan Arjasari.
Dadang Supriatna nepikeun realisasi jumlah ngomèan rutilahu di Kabupaten Bandung ti awal kapamingpinanana. Dina taun 2021 lobana 7.437 unit, taun 2022 lobana 7.397 unit, jeung taun 2023 lobana 7.506 unit.
"Dina palaksanaanana langkung tina target 7.000 unit," ceuk Dadang Supriatna nu dibarengan Bunda Bedas Emma Dety, Kepala Dinas Pemberdayaan Masyarakat dan Desa Kabupaten Bandung, Tata Irawan katut para OPD sèjènna.
Dadang Supriatna nètèlakeun, lantaran can kabèh rutilahu bisa diungkulan, inyana miharep ieu program bisa dituluykeun pikeun panglayan ka masarakat.
"Kango pangungkulan rutilahu, saban desa dianggarkeun 6 unit. Seueurna 37 rèbu rutilahu moal rèngsè, nèmbè tiasa rèngsè upami kapamingpinan simkuring dilajengkeun,," ceuk Dadang Supriatna satengah kampanye, dina Pilkada engke ngandidat deui nyalon bupati *** Sopandi
