Network
GALURA.CO.ID -Tempat ngaladenan warga di Desa Cangkuang Kulon Kecamatan Dayeuhkolot Kabupaten Bandung taun ieu bakal pindah ka kantor anyar teu anggang ti kantor nu heubeul.
Sekretaris Desa Cangkuang Kulon, Gun Gun H. Gunawan nyebutkeun, kantor nu anyar geus tèrèh rèngsè dibangun. Pangwangunan kantor anyar lima termin tina bantuan gubernur. Lebahna kuloneun palataran gedong serba guna desa.
"Insyaallah taun ieu, saatos dibangun lima tahap tina bantuan gubernur, kantor nu enggal badè ditempatan. Kantor nu lami janten sekretariat BPD, LPMD atanapi Karang Taruna, "ceuk Gun Gun, Rebo, 27 Maret 2024.
Baca Juga: Dina Rembug Bedas, Kepala Desa Lampegan Miharep 13 Program Prioritas Bupati Bandung Nuluy
Desa Cangkuang Kulon salasahiji desa nu kepala desana dijabat ku Plt, lantaran kepala desa definitifna mengundurkeun diri, aub dina Pemilu 2024 nyalonkeun diri jadi anggota legislatif DPRD Kabupaten Bandung.
Gun Gun H. Permana disebut-sebut pantes jadi Kepala Desa Cangkuang Kulon. Gun Gun nyebutkeun insya Allah lamun dipercaya warga.
Gun Gun H. Permana ngaku museur kana pagawèan di desa. Saban poèna cenah ngajalankeun fungsina di rohang gawèna euyeub ku tumpukan pirang-pirang berkas.
"Ieu memang tos kawajiban. Mugia di sasih Romadon sakumna perangkat desa sararèhat, ibadah puasana lancar. Iwal ti kitu sinergi antara pamarèntah ti tingkat RT-RW, kecamatan, kabupaten, provinsi, dugi ka pusat, " ceuk Gun Gun.*** Sopandi
