GALURA.CO.ID -Kepala Dinas Pekerjaan Umum dan Tata Ruang (PUTR) Kabupaten Bandung, Zeis Zultaqawa, nu ditepikeun ku Kepala Bidang Persetujuan Bangunan dan Gedung (PBG) DPUTR Kabupaten Bandung, Maulana Iswidiyanto nyebutkeun, aya paningkatan nu signifikan dina perizinan bangunan gedung ti saprak dilumakukeunana Sistem Informasi Manajemen Bangunan Gedung (SIMBG).
“Angka perhitungan PBG bènten sareng izin mendirikan bangunan (IMB), atuh targetna ogè undak. Kawitna Rp 8 miliar, janten ampir tilu kali lipet janten Rp 21 miliar di taun 2022,” ceuk Maulana Iswidiyanto ka Galura di rohang gawèna, Rebo, 20 Maret 2024.
Maulana ngajelaskeun, SIMBG tèh sistem elektronik nu diluncurkeun ku Kementerian PUPR jang ngèntèngkeun proses perizinan bangunan gedung secara online. Sistem ieu kaintegrasi kana Online Single Submission (OSS), ngurus izin bangunan gedung make saportal waè.
Sistem SIMBG , ceuk Maulana karèk bisa dirarapkeun maksimal taun 2022, najan diluncurkeunana taun 2021, alatan aya perbedaan istilah jeung regulasi antara IMB jeung PBG, jeung perluna peta nu ngatur peralihan sistem.
Nurutkeun Maulama, halangan utamana mah dina pangrarap SIMBG tèh masarakat nu can biasa ku sistem online. “Sanaos sistemna digampilkeun, masih kènèh seueur masarakat nu can paham cara upload dokumen nu leres.” pokna.
Maulana nyebutkeun, tina 3.411 pemohon PBG mu geus diajukeun liwat SIMBG danget ayeuna, sajumlah 2.119 pamohon geus karealisasi, kari sèsana keur proses.
Maulana miharep ku leuwih loba masarakat nu ngamangpaatkeun SIMBG, proses perizinan bangunan gedung bisa jadi leuwih èntèng, gancang jeung transparan.*** Sopandi