Network
GALURA.CO.ID -Anggota DPRD Kabupaten Bandung, H. Tedi Supriadi, S. Pd. I., M. Si nutup Reses Masa Sidang II Tahun 2024 DPRD Kabupaten Bandung ku ngondang konstituenna Dapil 2, ti Desa Margahayu Selatan jeung Desa Sayati.
Konstituenna nu ogè tim suksesna diriungkeun di panganjrekanana di Desa Sukamukti Kecamatan Katapang, Saptu, 16 Maret 2024.
Iwal ti ngawadahan aspirasi warga, dina reses nu ku H. Tedi leuwih pantes disebut silaturahmi teh, ogè digunakeun pikeun H. Tedi nganuhunkeun ka tim sukses jeung masarakat kana kapercayaan ka dirina adi anggota dewan nu kadua periode.
Baca Juga: Anggota DPRD Kabupaten Bandung Ir. Aep Dedi Ngelingan Nonoman sangkan Nolih Lingkungan
H. Tedi ogè nerangkeun kronologi dirina nu bisa lolos deui jadi anggota dewan ti Dapil 2 nu dianggap dapil naraka.
Ceuk Tedi, loba nu nyangka dirina teu lolos jadi deui anggota DPRD, sabab di dua kecanatan ti opat kecamatan nu aya di Dapil 2, nyaèta Kecamatan Dayeuhkolot jeung Kecamatan Margahayu H. Tedi èléh ku caleg sèjènna, padahal 2 kecamatan èta tèh dina Pemilu 2019 tèh lumbung sorana.
Ku lolosna H. Tedi jadi anggota DPRD dina Pemilu 2024, hartina anu kadua periode. Inyana mimiti asup anggota DPRD Kabupaten Bandung tina Pemilu 2019.
Ku kituna, H. Tedi jadi hiji anggota senior ti dua anggota DPRD Kabupaten Bandung ti Dapil 2. Hiji deui Ir. Aep Dedi nu geus katilu periodena.
Ti Dapil 2 jumlah anggota DPRD aya 8, Tedi jeung Aep Dedi dua urang anggota senior, sesana anggota anyar.*** Sopandi
