Network
GALURA.CO.ID -Bupati Bandung Dadang Supriatna nandatangan tilu Rencana Detail Tata Ruang (RDTR), satutas Desember 2023 tiheula disatuyuan substansina ku Kementerian ATR/BPN. Ieu RDTR, ceuk Dadang Supriatna, rencana rinci keur tata ruang wilayah nu dilengkepan ku paraturan zonasi.
"RDTR sareng paraturan zonasi diperyogi pisan kanggo acuan operasional dina pamangpaatan tur pangadalian rohang, kalebet kanggo masihan idin atanapi Kesesuaian Kegiatan Pemanfaatan Ruang (KKPR)" pokna di rohang Bale Sawala Soreang, Senèn, 22 Januari 2024.
Panyatujuan substansi Desemner harita ceuk Dadang Supriatna keur tilu rancangan peraturan bupati ngeunaan RDTR: RDTR WP Cicalengka, Nagreg jeung Rancaekek taun 2024-2044. "Kabupaten Bandung tos ngagaduhan 4 RDTR sareng ayeuna ditambih deui 3. Tangtos ieu tiasa ngaronjatkeu daya saing palebah investasi," ceuk Dadang Supriatna.
Baca Juga: Bupati Bandung: Tepi ka Ahir 2023 Investasi di Kabupaten Bandung Rp 30,3 Triliun
Dadang Supriatna miharep ieu RDTR bisa jadi acuan nu ngeuna, pas, kaukur, efektif jeung efisien keur para stakeholder dina perencanaan pembangunan. "Ieu RDTR ogè engkèna kedah janten acuan dokumen perencanaan sareng implementasi pangwangunan di lapangan ,” pokna.
Kepala Dinas Pekerjaan Umum dan Tata Ruang (DPUTR) Kabupaten Bandung, Zeis Zultaqawa nerangkeun, sajaba 3 RDTR nu ditetepkeun ku Bupati Bandung, Kabupaten Bandung danget ayeuna ogè geus mibanda 4 RDTR nu geus ditetepkeun kalawan ngawengku 7 kecamatan jeung 1 kawasan strategis kabupaten kalawaan total legana kana 21.626,1 ha.
“Opat kawasan nu tos ditetepkeun sateuacanna: RDTR Bagian Wilayah Perencanaan (BWP) Kawasan Terpadu Permukiman Tegalluar, RDTR BWP Bojongsoang, RDTR WP Baleendah sareng RDTR WP kawasan perkotaan Soreang terpadu nu nyakup lima kecamatan, nyaèta Soreang, Katapang, Kutawaringin, Margahayu, sareng Margaasih,” ceuk Zeis.
Dina taun 2024 ceuk Zeis, , aya genep RDTR nu jadi target persetujuan substansi, di antarana RDTR WP Arjasari, Banjaran, Cangkuang, Majalaya, Cimenyan katut Cilengkrang. “Ogè aya 4 RDTR nu jadi target panyusunan jeung APBD: RDTR WP Pacira (Pasirjambu, Ciwidey, Rancabali), Pangalengan, Dayeuhkolot, Cileunyi. Tur 2 RDTR nu ngarupakeun bantuan teknis ti Kementerian ATR/ BPN nyaèta RDTR WP Cikancung jeung RDTR Paseh,” pokna.
