Ketua KPU Jawa Barat: Patugas KPPS Kudu Paham IT

GALURA.CO.ID -Ketua KPU Provinsi Jawa Barat Umi Wahyuni netelakeun anggota Panitia Pemilihan Kecamatan (PPK), Panita Pemungutan Suara (PPS), jeung Kelompok Panitia Pemungutan Suara (KPPS) kudu kudu bisa jeung biasa ngoperasikeun aplikasi  handphone (HP) boh Android boh iPhone.

"Paling copel mibanda WhatsApp (WA). "Teu kenging gaptek. Kedah gaduh medsos paling henteu gaduh WA," pokna waktu ngaluuhan rapat koordinasi ngabentuk Badan Ad Hoc KPPS Pemilu 2024 di Fitra Hotel Majalengka, Salasa (05/12/2023) nu digelar ku KPUD Majalengka.

Ketua KPUD Majalengka, H. Agus Syuhada, netelakeun  Pemilu 2024,  nu bakal dilaksanakeun tanggal 14 Februari 2024, tinggal ngitung poe. KPUD  Kabupaten Majalengka geus ngalakukeun sababaraha tahapan.

Baca Juga: Dr. H. Irfan Nur Alam, SH, MH Kapilih Jadi Ketua Dewan KORPRI Kabupaten Majalengka Periode 2023 - 2028

Dina Pemilu 2024, di Kabupaten Majalengka, Tempat Pemungutan Suara (TPS) jumlahna 3. 927 sumebar di 334 desa jeung kelurahan fi 26 kacamatan. Diperlukeun patugas KPPS 35. 343 urang. Rekrutmen anggota KPPS dimimitian tanggal 11 Desember 2023. "Patugas KPPS  kedah paham IT," ceuk H. Agus.

Dibentuk KPPS dumasar Keputusan Komisi Pemilihan Umum (KPU) Nomor 1669 Tahun 2023 ngeunaan Perubahan Ketiga Atas Keputusan KPU Nomor 476 Tahun 2022 ngeunaa Pedoman Teknis Pembentukan Badan Adhoc Penyelenggara Pemilihan Umum dan Pemilihan Gubernur, Bupati dan Wakil Bupati, serta Walikota dan Wakil Walikota.

Kapolres Majalengka AKBP Indra Novianto, S.I.K., M.Si., CPHR., nandeskeun KPPS teh ujung tombak  Pemilu. "KPPS mibanda tanggel waler nu ageung. Suksesna Pemilu gumantung kana kinerja KPPS," pokna.

Rapat koordinasi oge jadi forum diskusi antara kapulisian jeung KPU ngeunaan aspek logistik, kaamanan, jeung kasiapan teknis lianna sangkan  Pemilu 2024 sukses.

Kapolres Majalengka miharep kolaborasi  antara kapulisian jeung KPU bisa mere kontribusi pikeun ngawujudna Pemilu nu demokratis, aman, tur transparan.*** Ayank R Sambara