Umurna geus meh Saabad, Teu Kungsi Kasab Sèjèn Abah Ahmad Solèh 50 Taun Dagang Gulali

GALURA.CO.ID- Ngaranna Ahmad Soleh, umurna 94 taun. Geus 50 taun dagang gulali. Cenah mah teu kungsi ngalaman kasab kana nanao iwal ti dagang gulali.

Ngalaman hirup jaman kolonial Walanda jeung Jepang. Bah Ahmad pituin urang Pasirkoja, dumukna di Jalan Seketimbang RT 01/04. Hirup nyorangan, sabada bojona tilar dunya 7 taun ka tukang.

Bah Ahmad Soleh boga anak 3, lalaki hiji, awèwè dua, geus kurenan. Nu lalaki nuluykeun Abah Ahmad nyieunan gulali. Anu awewe, nu saurang di Bekasi saurang deui di Tasikmalaya.

Baca Juga: Ciamis Teu Ngirimkeun Dalang ka Binojakrama Pedalangan di Kabupaten Bandung, Disbudpora Ciamis Ngabetem

Abah Ahmad Soleh geus teu nyieunan guli, tapi ngadagangkeun gulali jieunan Hamdan budakna tèa. Sapoena kana 200 tepi ka 300 gulali diiderkeunana teh, dina sapedah kumbang.

Harga hiji gulali Rp 2000. Ceuk Abah Ahmad, teu tangtu bèak sabaraha hiji. Ngan cenah hasil usahana dicukup-cukupkeun keur kaperluan sapopoè.

Sok kabantu lamun aya nu haat, meuli 1 atawa 2 duitna Rp 10 rèbu atawa Rp 50 rèbu tara dipènta pulanganana. Abah Ahmad ogè sok narima pesenan nu ulang taun.

Ngiderna gè tara nguriling, tapi mangkal dimana aya karamèan. Saperti harita, Ahad 19 Nopember 2023, Abah Ahmad karèk jol ka tempat mangkal di komplek Taman Kopo II Desa Rahayu Kecamatan Margaasih. 

Baca Juga: Lomba Literasi SD, pikeun Ngaronjatkeun Numerasi Sakola di Kabupaten Bandung