Rapat Teknis Kebudayaan 2023 Balai Pelestarian Kebudayaan Wilayah IX, Tarekah Ngamajukeun Kabudayaan

GALURA -  Rapat Teknis Kebudayaan 2023 digelar minangka tarekah pikeun ngadumaniskeun rupaning program kabudayaan.

Ayana adumanis nu merenah, boh ti unsur pamarentah boh unsur masarakat, baris nguatkeun usaha gotong-royong geusan ngahontal kamajuan ekosistem kabudayaan.

Da dihenteu-henteu, tarekah ngokolakeun saniskara program kabudayaan teh estu merelukeun rukun gawe ti sakumna pihak.

Kitu antarana nu kaguar dina bubuka Rapat Teknis Kebudayaan 2023 nu digelar ku Balai Pelestarian Kebudayaan Wilayah IX Provinsi Jawa Barat, Kementerian Pendidikan Kebudayaan Riset dan Teknologi, Senen, 14 Agustus 2023, di Soreang, Kabupaten Bandung.

Baca Juga: Rapat Teknis Kebudayaan 2023 Balai Pelestarian Kebudayaan Wilayah IX, Kabudayaan Minangka Program Prioritas

Kepala Balai Pelestarian Kebudayaan Wilayah IX, Dwi Ratna Nurhajarini, ngeceskeun, Balai Pelestarian Kebudayaan boga fungsi antarana ngalaksanakeun program nangtayungan cagar budaya katut objek ngamajukeun kabudayaan.

Laju masilitasan lagu ngamangpaatkeun cagar budaya, katut ngalaksanakeun kamitraan dina mulasarana.

"Lian ti eta, oge ngadata jeung ngadokumentasikeun cagar budaya, objek nu dianggap cagar budaya, objek pemajuan kabudayaan, ngamonitor turta evaluasi," pokna.

Tah, ku kituna, kalintang pentingna pikeun urang sarerea ngadumaniskeun rupa-rupa program geusan ngahontal kamajuan kabudayaan.