Network
GALURA - Polres Majalengka Polda Jabar ngungkab kasus pencurian dengan kekerasan (curas), ulon-ulonna dua urang dicangkalak, M (23) warga Kecamatan Palasah jeung G (23) warga Kecamatan Rajagaluh Kabupaten Majalengka.
"Curas M jeung G, arinyana ngarampas handphone korban nu masih keneh budak, nodongkeun pepestolan paranti nyeungeut roko,” ceuk Kepala Polres Majalengka AKBP Indra Novianto nalika Konferesi Pers di pakarangan Sat Rekrim Polres Majalengka, Senen(17/4/2023).
M jeung G milampah curas di wikayah hukum Polres Majalengka dina poe Rebo (12/4/2023) jam 00.30 WIB di hiji Pos Sat Kamling nu aya di wilayah Desa Lojikobong Kecamatan Sumberjaya.
Eta dua ulon-ulon curas teh menta ponsel korban. “Aya salasawios nu lumpat ngiberan warga, saterasna wangsul deui ka tempat kajantenan disarengan ku warga," ceuk Kapolres.
Warga ngahurup M jeung G. Duana ngaluarkeun bedog. Duana ngabubat-babit bedog ngabalukarkeun aya warga nu tatu. “Tapi ahirna M sareng G tiasa diperuhkeun ku warga, sarta dipasrahkeun ka pulisi,” ceuk Kapolres.
Dua ulon-ulon katut barang bukti saterusna dibawa ka Polres Majalengka sarta baris diproses penyidikan salajengna,” ceuk Kapolres. Duana dijiret Pasal 365 KUHpidana kalayan hukuman penjara salamu-lamina salapan taun," ceuk AKBP Indra Novianto.*** Ayank R Sambara
