Network
GALURA - Haol Akbar di Ponpes Roudlotul Ulum téh minangka panggeuing lenyepaneun yén urang saréréa baris ngalaman maot. Ku ayana pangajian haol, dipiharep sakumna insan bakal leuwih hadé deui ihtiar geusan ngama'naan tujuan kahirupan.
Haol Akbar di Ponpes Roudlotul Ulum digelar Kemis, 30 Maret 2023, dihadiran ku santri, jamaah, warga budeureun, sarta ondangan séjénna, nu ti kawit bada lohor geus mimiti jul-jol.
Anapon Ponpes Roudlotul Ulum perenahna di Kampung Cisasawi, Desa Cihanjuang, Parongpong, Kabupaten Bandung Barat.
Dina Haol Akbar harita, runtuyan du'a ditujulkeun pikeun KH Muhammad Bisyri, KH Aceng, KH Ondo Boedowi, KH Abdul Aziz, KH Mami Muchtar, Hj. Sa'adah, Hj. Siti Sopiah, Hj. Siti Maryam, sarta parakaruhun kasepuhan Desa Cihanjuang.
Baca Juga: Ponpes Roudlotul Ulum, Lalakon 20 Taun Ihtiar Geusan Ngagumelarkeun SDM nu Mibanda Ahlakul Karimah
Diawalan ku tawasulan, diteruskeun kana tahlilan, istigosah, serta tausiah ti sesepuh Ponpes Roudlotul Ulum, KH Ubaidillah AB.Ogé aya manakiban macakeun riwayat hirup KH Muhammad Bisyri, ulama moyan Cihanjuang nu wafat taun 1963.
Ceuk KH Ubaidillah, ieu pangajian haol téh mungguh leubeut ku hikmah.
Lian ti ngadu'akeun paraahli kubur, haol gé minangka pangeling kana maot sangkan urang terus ihtiar pikeun nyiapkeun bekel jaga keur di alam ahérat.
"Salaku jalma nu iman, urang yakin sanggeusna maot téh baris aya deui tahap satuluyna sanghareupeun nu perelu bekel sahadé-hadéna," pokna.
Pangajian haol mibanda tujuan utamana nyaéta ngadu'akeun ahli kubur sangkan teu weléh meunang rahmat jeung pangampura Allah, sarta ngalap tuladaneun ti ahli kubur.
Dina Hadits Riwayat Imam Thabrani, Rasulullah ngadawuh: “Maranéhanana nu cerdas téh nyaéta jalma nu pangmindengna éling kana maot, dibarung ihtiar sahadé-hadéna nyanghareupan tahap kahirupan satuluyna."
“Ku kituna, urang mangpaatkeun umur kahirupan keur pepelakan kahadéan, sangkan engkéna gé bisa panén kahadéan," ceuk KH Ubaidillah.
Sedengkeun hikmah tina dibacakeunana riwayat hirup (manakiban) nyaéta ngalap tuladaneun paraahli kubur, jasa-jasana ka agama jeung lingkungan masarakat.
“Atawa nu jadi anak bakal terus miémut jasa kolotna, atawa guruna dina nyebarkeun élmu ka muridna," ceuk KH Ubaidillah.
Hikmah séjénna dina Haol Akbar di Ponpes Roudlotul Ulum téh leuwih ngaronjatna tur paheutna ukhuwah atawa beungkeutan duduluran.
Haol Akbar rengsé pasosoré saméméh meneran waktu adan Magrib. Sakumna jamaah solat Magrib, laju ngararasakeun rupaning idangan buka puasa.***
Baca Juga: Safari Ramadan AHY ka Roudlotul Ulum, Ketak Santri keur Kamaslahatan Bangsa
