Network
GALURA – Pemerintah Kota (Pemkot) Cimahi satekah polah ngagederkeun tékad ngarojong program Indonesia Bebas TBC Taun 2030.
Dina raraga Hari Tuberkulosis Sa-Dunya nu dipieling unggal 24 Maret, Pemkot Cimahi terus ngungkulan kasakit TBC balukar bakteri Mycobacterium Tuberculosis malar kasusna mingkin ngurangan.
Utamana di Kota Cimahi, jero taun 2022 aya 4.294 kasus TBC, ngaronjat 106 persén. Sedengkeun di sakuliah Indonesia, taun 2022 téh aya 717.941 kasus, ngaronjat 61,98 persén.
Anapon dumasar data World Health Organization (WHO), tétéla jumlah kasus TBC di Indonesia téh panglobana kadua sadunya sanggeusna India.
Nilik éta kaayaan, Pj. Wali Kota Cimahi, Dikdik S. Nugrahawan, cumeluk ka sakumna pihak pikeun paheuyeuk-heuyeuk merangan TBC di Kota Cimahi.
Waktu gempungan ngungkulan TBC di Gedong Kornel Singawinata RS Dustira, Kota Cimahi, Rebo, 15 Maret 2023, Dikdik S. Nugrahawan ngécéskeun, kasakit TBC lain waé pasualan kaséhatan, tapi ogé nodel kana widang sosial jeung ékonomi masarakat.
Baca Juga: Rumah Sakit Muhammadiyah Bandung Selatan, Muamalah keur Kamaslahatan Balaréa
TBC gé aya pakaitna jeung stunting, sabab kurangna gizi téh jadi faktor utama nu ngabalukarkeun kasakit TBC.
“Ku kituna, alatan TBC jeung stunting téh gedé pakuat-pakaitna, kalintang pentingna pikeun matotoskeun adumanisna kawijakan lintas sektor geusan ngarojong prosés eliminasi TBC taun 2030 katut nurunkeun prevalansi stunting jadi 14 persén dina taun 2024,” pokna.
