Korban Curanmor Bungaheun, Ngapimilik deui Motorna Dipasrahkeun ku Polres Majalengka

GALURA –Kepala Kepolisian Resor Majalengka (Polres Majalengka) Polda Jabar AKBP Edwin Affandi dibarengan ku Kasat Reskrim Polres Majalengka AKP, Febry H Samosir, di pakarangan Sat Reskrim Polres Majalengka, Salasa (7/3/2023) masrahkeun motor hasil curanmor ka nu bogana

Motor anu kapimilik deui ku bogana lobana 4 (opat). Eta teh hasil polisi di Polres Majalengka ngungkab kasus curanmor (pencurian kendaraan bermotor). “Di Polres Majalengka aya 10 motor nu diamankeun ti ulon-ulon curanmor, nu dicandak ku nu gaduhna nembe opat,” ceuk Kapolres Majalengka.

Kapolres Majalengka cumeluk masarakat nu motorna leungit ngacek ka Sat Reskrim Polres Majalengka bari mawa STNK jeung BPKB. Lamun luyu jeung SNTK jeung BPKB-na, babakuna dina nomer rangka jeung nomer mesin, motor dipasrahkeun ka nu bogana.

Baca Juga: Legislator PKB KH Maman Imanulhaq Wera, RSUD Ciereng Subang Nolak Pasen Rek Ngalahirkeun dina Kaayaan Kritis

Salasahiji motor nu diamankeun ti ulon-ulon curanmor teh bogana Nenda Jubaedah, Hinda Beat kelir beureum. Motor Nenda dirampas ku dua urang lalaki, Senen 17 Oktober 2022, jam 03:30 WIB di Jalan Leuweunggede Ciborelang, Desa Leuweunggede, Kecamatan Jatiwangi Kabupaten Majalengka.

Ulon-ulonna nu ngarampas motor Nenda can lila ieu dicangkalak, dua urang. Munggaran nu dicangkalak teh Jeffry Maulana alias Jeff (20 taun), urang Kelurahan Wanasari, Kecamatan Cibitung Kabupaten Bekasi.

Saurang deui masih rumaja, W (16 taun) asalna ti Desa Bongas Wetan, Kecamatan Sumberjaya Kabupaten Majalengka. Inyana nodongkeun sajam (parang) ka korban sarta nyokot sapedah motor Honda Beat nu korban.

Barang bukti nu geus diamankeun ku kapolisian:1 ( hiji ) unit KR2 merk/type Honda Beat , Nopol E – 6153 UM , taun 2018 , kelir beureum bodas, Noka MH1JM2124JK031319, Nosin JM21E – 2011480 katut STNK 4G 16.11 82 Home C nu diteundeun dina bagasina.

Salian eta diamankeun 1 (hiji) unit KR2 merk / type Yamaha Nmax , tanpa Nopol, kelir bodas scotlate kelir hideung, taun 2017, Noka teu jelas (blank), Nosin G3E4E – 0408924, 1 (hiji) lambar STCK ( Surat Tanda CobaKendaraan Bermotor ) jeung 1 (hiji) lambar Surat Katerangan ti pihak Leasing PT. Busaan Auto Finance.*** Ayank R Sambara