GALURA – Bahasan head line Galura cetak edisi I Juni 2023 nu medal Rebo, 30 Mei 2023 ngeunaan bakal digantina deui ngaran Kabupaten Ciamis jadi Kabupaten Galuh. Mun tea mah tulus jadi Kabupaten Galuh ulah tepi ka ngikis jati diri Ciamis nu islami.
Dina head line Galura cetak edisi I Juni 2023 disebutkeun jati diri tatar Ciamis nu islami di antarana di Kabupaten Ciamis loba pisan pasantren, malah teu saeutik pasantrean nu kakoncara. Kabupaten Ciamis jadi Kabupaten Galuh ulah tepi ka ngaleungitkeun jati diri Ciamis nu teu bisa dipisahkeun jeung Islam.
Kabupaten Ciamis diganti jadi Kabupaten Galuh, jati diri Ciamis nu islami kudu angger, malah mah kudu leuwih nanjeur. Dina head line Galura cetak edisi I Juni 2023, didadarkeun ngaran Kabupaten Galuh ulah tepi ka ngahirupkeun deui ritual jeung kapercayaan nu patukang tonggong jeung ajaran agama Is;am.
Baca Juga: Bupati Ciamis: ASN, ASN PPPK Kudu Ngaladenan Masarakat Sahade-Hadena
H Mamat Suryawijaya, anggota Komisi D DPRD Kabupaten Ciamis ti PPP ngasongkeun kamandang urang tatar Ciamis mun Kabupaten Ciamis diganti ngaranna jadi Kabupaten Galuh ulah tepi ka ngarasa beurat ku ngaran Galuh.
Galuh teh lain ngan saukur kecap, tapi ngandung palsapah nu jero. Eta wae Karajaan Galuh kurang leuwih salapan abad nanjeur. Mampu henteu warga tatar Galuh, pamarentah Kabupaten Galuh ngajalankeun kagaluhan tepi ka wewengkonna jadi leuwih maju.
Ngeunaan hari jadi Kabupaten Ciamis, H Mamat nyebutkeun saheulanan mah make titimangsa nu geus ditetepkeun ku DPRD Kabupaten Ciamis: titi mangsana kana pindahna puseur pamarentahan Kabupaten Galuh ti Cineam ka Barunay (Imbanagara).
Disebutkeun saheulanan lantaran Kabupaten Ciamis ayeuna keur ngarancang Kabupaten Ciamis diganti ngaranna jadi Kabupaten Galuh. Mun tea mah hari jadi Kabupaten Ciamis disalusur deui tepi ka digantina, heg ngaran Kabupaten Ciamis tulus diganti jadi Kabupaten Galuh, titimangsa hari jadi kabupaten oge kudu diganti deui.
Tulisan sejenna Kareta Api Bandung-Purwokerto, di Stasion Kroya Lokomotifna Diputerkeun (rubrik Warna Warni); Kaburu Ngukur ka Kujur, nyaritakan nonoman nu milih eureun digawe di hiji pangusaha alatan hariwang mikacinta anak dunungan (Satukangeun Lalangse).
Rubrik Nukcruk Galur, ngabahas ngeunaan Gunung Sadahurip di Kabupaten Garut nu dipercaya gunung meunang nyieun keur kapentingan religi. Dieuyeuban ku tulisan ngeunaan kalungguhan gunung dina budaya Sunda.
Carita nyambung karya Aan Merdeka Permana, Nyusud Tapak Nazi, dina Galura cetak edisi I Juni 2023 rengse sarta bakal diteruskeun kana episode Tapak Karuhun.
Parawargi nu hoyong ngalanggan Galura edisi cetak tiasa nepangan perwakilan Pikiran Rakyat (PR) nu aya di tiapa kabupaten sareng kota di Jawa Barat. Atanapi nepangan agen PR. Anu dumuk di luar Jawa Barat tiasa langganan via pos.
Alamat redaksi Galura, Jalan Asia Afrika nomer 77 Bandung, ngahiji sareng kantor redaksi Pikiran Rakyat. Telepon (022) 420 1634, ext.222.***