Network
GALURA – Bupati Ciamis, Herdiat Sunarya waktu ngistrenan PPPK (Pegawai Pemerintah dengan Perjanjian Kerja) sawatara waktu ka tukang meupeujeuhan sangkan ASN (Aparatur Sipil Negara) satekah polah ngaladenan masarakat sahade-hadena tepi ka masarakat ngarasa sarugemaeun.
Bupati Ciamis nyebutkeun ASN PPPK nu diistrenan harita lobana 357 urang. Ari anu miluan seleksi ngahontal 4400 leuwih. Tina 357 urang PPPK lolobana mah jabatan fungsional, tanaga kesehatan jeung guru nu sapopoena pagaliwota jeung masarakat.
“Simkuring meupeujeuhan ASN, kaasup PPPK, kudu ngalaksanakeun pancenna sahade-hadena, ladenan masarakat, ulah tepi ka masrakat kuciwa” ceuk Bupati Ciamis.
Dina eta kasempetan, Bupati Ciamis nyebutkeun di daerahna kakurang pagawe. Tina jumlah 5000 urang pagawe, taun 2019 nu pangsiun aya 2203 urang nu pangsiun. Najan taun ayeuna nambah 357 urang, tapi kakuranganana loba keneh.
Kabupaten Ciamis ka pamarentah pusat ngajukeun formasi 2996 orang urang pikeun ngangkat ASN PPPK, tapi nu dicumponan karek 2000 urang. “Masih 1000 urang nu dibutuhkeun ku pamarentah Kabupaten Ciamis, boh baik fungsional boh strktural,” ceuk Bupati Ciamis.
Bupati Ciamis amanat sangkan ASN PPP3K kudu loyak ka NKRI, hususnya ka pamarentah Kabupaten Ciamis. “Ulah neko-neko, ti taun 2021 geus aya 4 urang ASAN nu dipecat lantaran paripolahna teu hade,” pokna.
ASN kudu jadi panutan keur masarakat, ulah tepi ka mere conto nu teu hade. “Ladenan masarakat sahade-hadena. Najan cape oge sanghareupan masarakat kalayan someah,” ceuk Bupati Ciamis.*** Jarkasih
