GALURA - Safari Ramadan 1444 H Ketua Umum Partai Demokrat, H. Agus Harimurti Yudhoyono (AHY), poé Kemis, 30 Maret 2023, silaturahmi ka Ponpes Roudlotul Ulum.
Anjog sabada Asar ka éta ponpes nu aya di Kampung Cisasawi, Desa Cihanjuang, Kac. Parongpong, Kab. Bandung Barat, AHY katut réngréngan dibagéakeun ku KH Ubaidillah AB minangka sesepuh ponpes.
Silaturahmi AHY di éta ponpes diwangun dina wanda ngariung-ngawangkong jeung parasantri, jamaah, warga masarakat, katut ondangan lianna.
Ceuk KH Ubaidillah, kalintang bingahna kadatangan ku AHY di sajeroning Safari Ramadan 1444 H, bulan suci nu dilimpud kabarokahan.
Baca Juga: Haol Akbar di Ponpes Roudlotul Ulum, Miéling Tuladan Ahli Kubur
Laju inyana ngadadarkeun, yén pangajaran di Roudlotul Ulum gé nujul kana udagan malar santri engkéna bisa boga ketak dina sakumna widang keur kamaslahatan bangsa.
"Ku kituna dipiharep, santri lulusan Roudlotul Ulum gé bisa jadi aparat pamaréntahan, TNI Polri, usaha dagang, jeung sajabana. Rék naon waé gé ketakna, sing tetep nyantri," pokna.
Sedengkeun AHY mertélakeun, dina sajarah perjoangan bangsa, kalangan santri geus némbongkeun ketakna nu luar biasa enggoning kamaslahatan bangsa.
Minangka nagara démokrasi nu kawilang nagara badag, NKRI diwengku ku rupa-rupa kasang tukang sosial budaya nu kabeungkeut dina Bhineka Tunggal Ika.
Baca Juga: Ponpes Roudlotul Ulum, Lalakon 20 Taun Ihtiar Geusan Ngagumelarkeun SDM nu Mibanda Ahlakul Karimah
"Poténsi kalangan santri geus ngabukti mawa maslahat dina runtuyan sajarah perjoangan bangsa. Kuring kalintang bingahna aya entragan ngora bakal caleg ti Partai Demokrat, nyaéta H. Bahtiar ti Roudlotul Ulum, nu baris makalangan bajoang dina widang legislatif enggoning ngamajukeun bangsa," pokna.
Ku kituna, AHY umajak ka sakumna unsur bangsa pikeun terus paheuyeuk-heuyeuk ihtiar ngamajukeun bangsa, kaasup mingkin ngaronjatna kapasitas kalangan santri.
"Kamajuan bangsa, antarana perkara atikan jeung paékonomian, éta gé jadi udagan pikeun karaharjaan balaréa, kalawan mampuh dipokalan ku parasantri," ceuk AHY.
Dina éta Safari Ramadan 1444 H di Ponpes Roudlotul Ulum tea, AHY gé ngaroris rupa-rupa stand UMKM, tur masrahkeun bantuan beasiswa keur santri Roudlotul Ulum. ***