GALURA.CO.ID -Bewara ngagumbirakeun keur urang Majalengka nu mikaresep mie lada. Restoran Mie Gacoan geus muka cabangna di Jalan KH Abdul Halim Kelurahan Majalengka Kulon, Kecamatan Majalengka, Kabupaten Majalengka. Grand Openingna, Kemis (06/06/2024).
Grand Opening Mie Gacoan diluuhan ku Pj Bupati Majalengka, Dandim 0617/Majalengka, Kapolsek Majalengka, Kasatpol PP Majalengka, Kepala DPMST jeung Humas Mie Gacoan Cababang Majalengka.
Dandim 0617/Majalengka Letkol Inf Dudy Pilianto, ngapresiasi dibuka cabangna Mie Gacoan nu tangtuna muka lapangan pagawean keur masarakat.
Masih ceuk Dandim, pamugi ieu tempat kuliner bisa mere kontribusi positif pikeun masarakat jeung bisa ngarojong tumuwuhna UMKM Majalengka.
"Sanes eta wae, ku ayana Mie Gacoan nambihan destinasi kuliner anu aya di Majalengka. Anu dipiharep satuluyna bisa kolaborasi jeung produk UMKM di Majalengka,” ceuk Letkol Inf Dudy Pilianto.
Mie Gacoan teh restoran mie kakoncara asal Malang anu diadegeun mimiti ti taun 2016 di Malang, Jawa Timur.
Panasaran ku menu, harga jeung lokasi Mie Gacoan anu aya di Kabupaten Majalengka? Menu-menu anu ditawarkeun di ieu resto mibanda sensasi lada anu beda.
Salian mie anu jadi menu andelan, oge disadiakeun siomay, udang rambutan, udang keju, lumpia udang jeung pangsit goreng.
Inumanana es gobak sodor, es teklek, sluku bathok, es petak umpet, air mineral, lemon tea jeung sajabana.
Mie Gacoan geus kawentar restoran mie lada dipikaresep ku budak ngora.
Sensasi pedas ti menu-menu anu ditawarkeun jadi daya irut dirangan pikeun sakumna pecinta pedas. Andini (17), ngaku dirina datang ka resto Mie Gacoan lantaran panasaran ku rasa.
“Saleresna langkung ka panasaran, teras menu-menuna eta memang tos seueur pisan, margi kantos nyobian di luar Majalengka oge memang raos anu tangtosna pas di kantong,” ceuk Andini, Kemis, (6/6/24).
Areal Legal Manager Mie Gacoan Jawa Barat, Muhamad Irfan Kasuma nyebutkeu Mie Gacoan i geus sumebar di Indonesia sarta masih terus dimekarkeun.
Inyana netelakeun leuwih ti 70 persen karyawanna asalna ti Majalengka. Inyana ngahatur nuhunkeun ka masarakat jeung pamarentahan Majalengka anu geus ngarojong dibukana Mie Gacoan di Kabupaten anu kawentar ku julukan "Kota Angin" .*** Ayank R Sambara