GALURA – Made Putra, dosén musik di Universitas Pasundan (Unpas) Bandung, tétéla boga udagan ngawujudkeun désa saxophone.
Éta udagan Made Putra geusan ngawujudkeun désa saxophone téh pamianganana tina leubeutna pibahaneun nyieun saxophone di lemah cai.
Katambah ogé kailhaman ayana samodél désa saxophone di Taiwan, nu méh sakumna warga mroduksi pirang-pirang bagéan tina saxophone.
Alat musik saxophone diwengku 7 bagéan, nu masing-masing bagéan saenyana bisa diproduksi di dieu.
Najan pasarna kaasup segmentatif, tapi tetep aya lolongkrang pikeun mroduksi tur masarkeun saxophone.
Kitu pangna Made Putra boga udagan ngawujudkeun désa saxophone, copélna di lemburna inyana ayeuna dumuk.
Mimiti neuleuman kana spesialisasi saxophone taun 2010, tétéla inyana gé ngamekarkeun kamotékaran nyieunan mouthpiece.
Mouthpiece téh alat nu fungsina keur niup saxophone, nu matak sora saxophone boga ciri mandiri.
Baca Juga: Tarekah Rahmat Angkung ti Saung Angklung Mang Udjo sangkan Angklung Diaku Warisan Dunya ku UNESCO
Éta mouthpiece disimpenna dina biwir saxophonist (pamaén saxophone). Sabot inyana maénkeun saxophone, tah sorana téh tina mouthpiece.
Mouthpiece lir nyawa dina saxophone, lolobana dijieun tina ebonit atawa metal, ogé aya nu tina kai atawa palastik.
Di Indonesia, Made Putra kawilang pangrajin mouthpiece nu geus kawentar di kalangan saxophonist profesional.
Inyana naratas mroduksi mouthpiece ti kawit taun 2019.
Waktu ngawangkong di imahna, di Kampung Jeungjingrigil, Désa Sariwangi, Kecamatan Parongpong, Kabupaten Bandung Barat, sawatara waktu kaliwat, Made Putra ngécéskeun, “Desain mouthpiece minangka hal nu kudu jadi tinimbangan kalawan daria, sabab dimensi jeung bentukna téh mibanda éfék nu mangaruhan kana ajén nada, volume, pitch, fleksibilitas, katut katumaninahan sabot maénkeun saxophone.”
Karya mouthpiece produksi inyana dipaké ku parasaxophonist top Indonesia saperti Ricad Hutapea, Nicky Manuputy, Dames Nababan, Grup Saxophone Sax in The City, Grup The Saxobrothers, jeung nu lianna.
Sedengkeun saxophonist mancanagara, mouthpiece karya Made Putra téh dipake ku Sebastien Trognon (Prancis), Francois Diaz (Prancis) , Rafal Jedruch (Polandia), jeung Samuel Hernandez (AS).
Baca Juga: Seniman di Kuningan, Ngariung Teu Semet di Panggung
Lian ti saxophonist profesional, Made Putra (36) gé sapopoéna mancén jadi dosén Akustik dan Psikologi Musik di Prodi Musik, Fakultas Ilmu Seni dan Sastra, Universitas Pasundan (Unpas), Kota Bandung.
Mimiti minat nyieunan mouthpiece alatan sok gunta-genti mouthpiece pédah hésé nyiar nu pas kana karakter sora nu dipikahayangna.
“Kuring laju niténan detai-detail mouthpiece nu sok dipaké, tepi ka ahirna taun 2017 bisa nyieun mouthpiece munggaran nu langsung dipaké,” ceuk Made Putra.
Ti harita, sanggeusna riset 2 taun, inyana gilig mroudksi mouthpiece pikeun masarakat kalangan saxophonist, kalawan brand Made Mouthpieces, minangka brand mouthpiece munggaran di Indonésia.
Singhoréng, produksi mouthpiece inyana meunang pangbagéa, loba nu minatna, tepi ka Made Putra gé nyieun brand séjénna nyaéta Sonic Saxophone jeung Lambey Works.
Brand Made Mouthpieces notog kana mouthpiece saxophone, anapon brand Sonic Saxophone mah mokus kana saxophone sarta aksesorisna.
Mouthpiece jieunanana mibanda méh ampir sakabéh variasi karakter sora, ti mimiti bright (karakter sora nu cempréng/treble) tepi ka warm (karakter sora nu nga-bass/bassy/timbre).
Éta variasi karakter mouthpiece bisa digunakeun dina sakumna tipe saxophone saperti jenis soprano, alto, tenor, jeung bariton.
Sedengkeun bahan-bahan keur nyieun mouthpiece téh nyaéta resin (thermoplastic), hybrid campuran resin jeung kuningan, sarta perunggu.
Baca Juga: Pagelaran Longser 4D, Daring, Durarang, Duraring, Dong, Sambada UPI Bandung, Hirup Mah Perjoangan!
Proses nyieunna dipigawe ku sorangan, dilakonan di studio ukuran 1,5 m x 2,5 m di tukangeun imahna.
Dimimitian ku prosés desain nu dilakukeun dina komputer software simulasi sangkan detail katut ukuran luyu jeung nu dipikahayang.
Laju dibagi jadi 2 nyaéta handmade jeung mesin 3D Printer. Mouthpiece bahan perunggu katut hybrid dijieun kalawan handmade, sanggeusna prosés dummy (citakan) dina 3D Printer.
“Sedengkeun keur nu bahan resin mah hasil citakan tina 3D Printer, nu satuluyna di-finishing kalawan manual,” ceuk Made.
Kiwari, produksi mouthpiece Made Putra jumlahna luyu jeung pesenan.
Tina sababaraha varian téh, dina jero sabulanna rata-rata mroduksi 30 mouthpiece.
Harga hijianana ti mimiti Rp 900 rébu tepi ka Rp 1,2 juta. Sedengkeun nu bahan metal mah hargana Rp 3 juta.
“Dina sabulanna, alhamdulillah rata-rata aya 10 nu mesen, 10 persen ti Eropa tur Amerika Serikat. Pangjauhna nu kungsi mesen téh ti Argentina,” ceuk Made Putra.
Tah, tina ancrub sok nyieunan mouthpiece keur saxophone téa ti saprak 2019, antukna inyana boga patékadan ngamekarkeun désa tempat padumukanana.
“Poténsi pasar saxophone kalintang legana, katambah di urang téh loba bahan-bahanna. Saxophone diwengku 7 bagéan, nu saenyana di urang gé bisa diproduksi. Moga waé ngawujud udagan kuring ngajadikeun Désa Sariwangi minangka Désa Saxophone,” pokna.***
Baca Juga: Putri Anjungsari (34), Prajurit Cirebon Ngudag nu Ngabelesurkeun Pangpung, Tapi Dipacikeuh