GALURA -Aya versi asal usul Nyi Roro Kidul, nu nyebuteun cenah Nyi Roro Kidul teh ngaran aslina mah Mayang Cinde, terah katujuh ti Prabu Hariang Banga.
Dina ieu versi asal usul Nyi Roro Kidul netelakeun Mayang Cinde lahir hasil tina ngalambangsarina Mas Galunggang Sentana ti Karajaan Majapahit jeung Ratu Sela Karang, bojo Raja Pamatang Sagara (Nusa Kambangan).
Nyai Ratu Sela Karang téh ratu pangawasa basisir ti semet muara Citanduy tepi ka Cipalebug di Cilauteureun (Pakidulan Garut). Kitu ceuk eta versi asal usul Nyi Roro Kidul
Sanggeus Nyai Ratu Sela Karang mulang kaasal, Mayang Cinde diistrénan ngaganti indungna kalayan gelarna Nyai Ratu Sagara Jampang, disebut ogé Nyai Ratu Kidul ti Pajajaran Girang (Priangan).
Dina nyekel pamaréntahanana Nyai Ratu Sagara Jampang dibantuan ku pandita sakti ti Nusa Larang (Pulau Christmas ayeuna) nu kawentar disebut Ki Gajah Liru Kanti Jaya.
Kacaturkeun Nyai Ratu Sagara Jampang hayang ngalegaan daérah kakawasanana, hayang ngalindih Palabuanratu. Maksudna dirojong pisan ku Ki Gajah Liru Kanti Jaya.
Harita Palabuanratu aya dina kakawasaan Nyai Ratu Kidul Mayang Sagara. Kalayan tipu muslihat, Mayang Sagara bisa ditawan ku Ratu Sagara Jampang. Ngan Mayang Sagara bisa disalametkeun ku salasaurang pandita nu keur nyamar.
Baca Juga: Nyi Roro Kidul teh Bojo Panembahan Senopati, Lain Mahluk Gaib Panguasa Laut Kidul
Ki Gajah Liru Kanti Jaya langsung nyanghareupan éta pandita. Perang tanding dua tokoh sakti ngalantarankeun jati diri duanana kabuka. Anu nyalametkeun Mayang Sagara téh Rakéan Kalangsunda pangawal Nyai Ratu Puun Purnamasari ibuna Mayang Sagara.
Ki Gajah Liru Kanti Jaya ogé kabuka samaranana. Singhoréng lain si itu si éta, tapi kurut pajabat di Padjadjaran. Inyana téh Jaya Antea manten Mantri Majeti Pakuan Pajajaran anu ngabélot ngabantu Kasultanan Banten basa wadyabalad ngagempur Karajaan Pajajaran.
Ki Gajah Liru Kanti Jaya najan dibantun ku tentara Mataram balad Nyai Ratu Sagara, kasoran, teu kuateun ngalawan Rakéan Kalangsunda. Nyai Ratu Sagara Jampang tuluy ngaloloskeun diri balik ka nagara asalna di Basisir Kidul Pajajaran Girang.
Saméméh mulang ka nagarana, Jaya Antea kedal ucap Palabuanratu bakal tetep jadi bagéan kakawasaan Mayang Cindé, sarta hiji waktu Mayang Cindé bakal ngarebut deui Palabuanratu ti Mayang Sagara.
Ucapan Ki Jaya Antéa jadi kanyataan, Nyi Mayang Cindé sanggeus kapuunan Mayang Sagara carem lantaran diburak-barik ku Mataram, ti alam gaib bisa ngawasa wewengkon Palabuanratu, kaasup lautna.***