GALURA - Kemis, 9 Februari 2023, meneran Hari Pers Nasional (HPN), poé nu kacida raketna jeung dunya pers di urang.
Malah, sacara nasional mah HPN téh dianggap penting kacida lantaran aya hubunganna jeung sajarah kamekaran pers di urang anu mimitina dipaké alat perjoangan.
Sajarah Hari Pers Nasional ogé raket pisan patalina jeung dibentukna organisasi PWI dina 9 Februari 1946.
Jadi, dina seuseuhanana, dipiélingna HPN téh meneran pisan jeung poéan milangkalana Persatuan Wartawan Indonesia (PWI).
Hari Pers Nasional ditetepkan ku Keputusan Presiden (Keppres) RI No. 5/1985 anu ditéken ku Presiden Soeharto tanggal 23 Januari 1985.
Hari Pers Nasional jadi salasahiji kacindekan tina hasil Kongres PWI ka-28 di Padang (1978). Dina éta kongrés, isu ngeunaan Hari Pers Nasional téh kaungkab tina kahayang tokoh-tokoh pers pikeun miéling peran pers Indonesia dina lingkup nasional.
Ku kituna, munasabah lamun unggal taun HPN teu weléh diayakeun tur “diramékeun” sacara nasional, bari unggal taunna téh pupuncakna acara giliran dipuseurkeun di ibu kota provinsi sa-Indonesia.
Taun ieu, HPN téh dipuseurkeun di Kota Medan Provinsi Sumatera Utara (Sumut). Temana: “Pers Merdeka, Demokrasi Bermartabat”.
Baca Juga: Ngareuah-reuah HPN 2023 di Sumut, Karya Urang ‘Galura’ Asup Buku Antologi Puisi Wartawan
Runtuyan kagiatan
Dina Hari Pers Nasional 2023, diayakeun rupa-rupa kagiatan anu digelar salila 6 poé (7-12 Februari 2023), di Gedung Serbaguna Pemprov Sumut, Pancing, Deliserdang.
Dicutat tina situs resmi HPN Sumatera Utara, ieu runtuyan kagiatan/acara miéling Hari Pers Nasional 2023:
7 Februari 2023
- Workshop Literasi Digital: Media Sosial & Entrepreneurship untuk Generasi Milenial dan Seminar Seruan dari Medan
- Seminar & Workshop Adinegoro
- Anugerah Kebudayaan
- Seminar Internasional: Media Sustainability Program IKWI
8 Februari 2023
- Seminar Internasional: North Sumatra Trade Tourism & Investment (Duta Besar)
- Konvensi Nasional Media Massa
- Seminar Olahraga & Rakernas SIWO
- Seminar Dana Perimbangan Pusat dan Daerah
9 Februari 2023
- Acara Puncak Hari Pers Nasional 2023
- Tour Danau Toba (9-10 Februari 2023)
Salila kagiatan (7-12 Februari 2023) digelar ogé “Pameran Hari Pers Nasional 2023” jeung “Pameran Tiga Abad Surat Kabar Indonesia” di Komplek Astaka Pemprov Sumut.
Paméran surat kabar midangkeun rupa-rupa koran jaman baheula, jeung koran-koran pelopor dina mangsa kolonial Belanda.
Lian ti éta, acara ogé dieusi ku rupa-rupa lomba pikeun masarakat Sumatera Utara, kayaning lomba E-Sport, Fashion Show, Cosplay Competition, jeung Barista Competition.***
Baca Juga: Mahasiswa Uniku, Ngadeudeul Kamekaran Wisata Ngaliwatan Poster Jeung Video