Network
GALURA – Dina film Gita Cinta dari SMA anu geus diputer sabulan ka tukang (9 Februari 2023) di bioskop sakuliah Indonésia, Prilly Latuconsina jeung Yesaya Abraham kapeto jadi pamaén utamana.
Dina ieu film anu ngangkat carita cinta Galih jeung Ratna téh, Prilly merankeun Ratna, sedengkeun Galih-na diperankeun ku Yesaya Abraham, béntang anyar di dunya film layar lébar.
Film nu diangkat tina novel légendaris Eddy D. Iskandar téh nyaritakeun romansa cinta pelajar SMA Galih jeung Ratna, ngan hubunganana henteu laju alatan teu dipanujuan ku bapana Ratna.
Ieu film Gita Cinta dari SMA produksi Starvision téh mangrupa remake (dijieun ulang) tina film produksi 1979. Harita, karakter Galih jeung Ratna diperankeun ku Rano Karno jeung Yessy Gusman.
Karakter Galih jeung Ratna dina éta film mungguh légendaris, sarua légendaris-na pasangan Rano Karno jeung Yessy Gusman dina film.
Baca Juga: Prilly Latuconsina, Ngarasa Bungah Bisa Nyugemakeun Indung-Bapana
Kahormatan jeung kareueus
Maén dina film Gita Cinta dari SMA, pikeun Prilly Latuconsina mah hiji kahormatan dibarung kareueus nu taya papadana.
"Ieu ogé hiji kahormatan pikeun abdi. Abdi tiasa maén dina ieu film, reueusna dua tikeleun. Terus terang, Gita Cinta dari SMA téh tongtonan pun bapa sareng pun biang, tur aranjeunna ngefans pisan ka sosok Galih sareng Ratna, ngefans pisan ka Ibu Yessy Gusman sareng Bapa Rano Karno," ceuk ieu béntang film, penyanyi, présénter, modél, pangusaha, aktivis, penulis, jeung produser nu gumelar di Tangerang, Banten, 15 Oktober 1996 téh, basa ngobrol dina sela-sela “Gala Premiere Film Gita Cinta dari SMA” di Ciwalk XXI, Bandung, sawatara waktu ka tukang.
Basa Prilly meunang tawaran jadi Ratna, cenah, manéhna langsung sasadu ka bapana. "Pa, aku dapat tawaran memerankan karakter Ratna di ‘Gita Cinta dari SMA’,” ceuk Prilly, nyaritakeun deui pok-pokanana waktu manéhna bébéja atawa sasadu ka bapana.
Baca Juga: Milu Makalangan dina Serial ‘The Last of Us’, Christine Hakim Kapeto Jadi Ilmuwan Indonesia
Biasana, ceuk Prilly, mun manéhna bébéja meunang peran dina hiji garapan, bapana ukur ngaréspon, “Oh gitu, oke, good luck.” Ieu mah teu kitu, cenah. Nampa béja kitu téh, bapana ukur olohok semu teu percayaeun, tapi tuluyna némbongkeun kabungahna.
“Hah? Serius? Ya ampun, Papa senang banget dan bangga sama kamu bisa kayak gitu,” ceuk Prilly, nyetakeun omongan bapana.
Bakating sumangetna syuting Gita Cinta dari SMA, Prilly Latuconsina tepi ka geringna bari satuluyna kudu dirawat di rumah sakit. Malah tepi ka ngalaman dua kali gering, cenah. Tapi indung bapana tuluy nyumangetan Prilly supaya geuwat-geuwat cageur deui sabihari.
“Sakit dua kali dibawa ke rumah sakit, tapi Papa Mama aku tetap tenang. Papa bilang, tenang tahanin ya, buat produksi Gita Cinta dari SMA,” ceuk Prilly.
Baca Juga: Ngahirupkeun deui Galih jeung Ratna, ‘Gita Cinta dari SMA’ Ngahudang ‘Baper’ nu Lalajo
Waktu aya preview filmna di kantor Starvision Plus, Prilly ngajak kolotna. Bapana tepi ka bijil cimata bari terus-terusan mumuji akting Prilly.
“Sambil nangis, Papa bilang gini ke aku, ‘ini adalah film terbagus kamu dan ini akting terbagus kamu’. Aku merasa jadi yang kemarin-kemarin nggak bagus. Cuma mungkin karena memang dia suka banget sama cerita Gita Cinta," ceuk ieu anak cikal ti dua sadudulur kulawarga Rizal Latuconsina (Ambon) jeung Ully Djulita (Sunda) téh.***
Baca Juga: Gala Premiere-na Poé Ieu, ‘Gita Cinta dari SMA’ Difilmkeun deui bari teu Mopohokeun 'Orisinalitas'
