GALURA – SMK Negeri Pertanian Pembangunan Lembang nu tiheula mah disebut Sekolah Pertanian Menengah Atas (SPMA), perenahna di Jl. Raya Tangkuban Parahu, Cilumber, Lembang, Kabupaten Bandung Barat.
Runtuyan kamekaran SMK Negeri Pertanian Pembangunan Lembang, dimimitian waktu diadegkeun 24 September 1964 kalawan dikokojoan ku masarakat Bandung Utara.
Dipokalan antarana ku Ikatan Pemuda Bandung Utara (IPBU), Lembaga Sosial Desa Cidadap, katut SPMA Tanjungsari, SPMA diresmikeun ku Gubernur Jawa Barat Mashudi tanggal 26 September 1965.
Baheula mah SPMA kampusna di Jalan Setiabudi, Kota Bandung, laju genti ngaran jadi SMK Negeri Pertanian Pembangunan Lembang tur ayeuna mah lokasina di Cilumber, Lembang tea.
SMK Negeri Pertanian Pembangunan Lembang nu kiwari dipupuhuan ku Dr. Edi Gunawan, S.Pd., M.Pd., mibanda udagan malar jadi SMK nu unggul dina widang pendidikan pertanian.
Utamana geusan ngawujudkeun generasi nu baris nuluykeun pangwangunan pertanian dibarung ahlak nu mulya, cerdas, parigel, ngawasa teknologi, mandiri, tur boga daya saeng.
Baca Juga: Lomba Pramuka Tingkat 3 Kabupaten Bandung Barat, Wadah Ngawujudkeun Generasi Pancasilais
Ieu sakola ge dipiharep bisa jadi model pikeun sakola sejenna, hususon sakola nu ngokolakeun widang studi pertanian.
Di sagedengeun ngagumelarkeun lulusan nu parigel jeung produktif ngamekarkeun agribisnis, oge bari ngawasa teknologi widang pertanian.
Ku kituna, SMK Negeri Pertanian Pembangunan Lembang satekah polah ngahasilkeun lulusan nu baris ngamajukeun dunya pertanian di Jawa Barat jeung nasional.
Dina prak-prakanana, SMK Negeri Pertanian Pembangunan Lembang ge boga tujuan kabentukna mental siswa sangkan tanggoh, mandiri, mibanda jiwa wirausaha, didasaran ku iman jeung takwa.
Anapon Program Kompetensi Keahlian di SMK Negeri Pertanian Pembanguan Lembang teh nyaeta Agribisnis Tanaman Pangan dan Hortikultura (ATPH), nu museur dina proses budidaya pepelakan, ti mimiti ngolah lahan, melak, panen, sarta pamasaranana.
Laju aya Program Keahlian Agribisnis Pengolahan Hasil Pertanian (APHP), nu mokus kana pangolahan hasil tatanen.
Sedengkeun Program Keahlian Lanskap dan Pertamanan, gurat badagna mah neuleuman arsitektur taman katut desain taman geusan ngigelan selera pasar, jeung eksplorasi enggoning ngamangpaatkeun tur makihikeun lahan. ***
Baca Juga: Nyurahan Pamaredih Jaman SMK Pasundan 1 Bandung Make Kurikulum Merdeka, Revitalisasi SMK Dijalankeun