Network
GALURA – Nu disebut alun-alun teh baheula mah ampir kabeh mangrupa lapang nu lega, lain taman cara ayeuna. Tatangkalan keur ngiuhan biasana aya di unggal juru. Biasana mah tangkal caringin.
Ku lantaran lega tea, lapangna sok dipake rupa-rupa kagiatan masarakat, sajaba ti dipake kagiatan resmi pamarentah (Walanda atawa Jepang mun jaman penjajahan mah). Alun-alun Bandung upamana.
Nurutkeun Sudarsono Katam Kartodiwirio dina bukuna “Bandung Kilas Peristiwa Di Mata Filatelis Sebuah Wisata Sejarah” (Kiblat 2006), dina taun 1900-an, alun-alun Bandung teh sok jadi tempat kagiatan masarakat.
Baca Juga: Cirebon Misahkeun Maneh ti Pajajaran, Walangsungsang Ngeclakeun Cipanon
Antarana wae, kungsi dipake tempat maenbal nu dilalajoan ku urang Walanda jeung gegeden Bandung lianna. Eta teh lumangsung taun 1900-1905 jeung 1914-1921.
Dina foto nu aya dina eta buku, katinggali nu lalajo di sisieun alun-alun Bandung. Aya nu narangtung, aya oge nu dariuk. Di lapang tembong pamaen keur parebut bal.
Lian ti sok dipake tempat maen bal, alun-alun Bandung teh sok dipake tempat pertandingan papanahan, ngadu domba jeung pintonan seni tradisional cara calung.
Baca Juga: Walangsung Ngababakan, Jadi Panguasa tapi Angger Babakti ka Pajajaran
Nurutkeun Sudarsono Katam Kartidiwirio, kagiatan nu mangsa harita rea nu mikaresep di alun-alun Bandung teh nyaeta ngadu domba.
“Alun-alun biasa digunakeun keur tempat ngadu domba nu minangka pintonan nu dianti ku warga Bandung baheulam,” cek eta panulis.
Padahal, cenah, soara jedukna tanduk domba nu diadu matak ketir jeung ngadatangkeun kahariwang sirah domba beulah.
Baca Juga: Karajaan Munggaran di Cirebon nu Ngadegkeunana Walangsungsang, Rundayan Galuh Kawali
Dina foto nu aya di buku, tembong dua domba hideung jeung bodas nu tandukna ranggaek keur tarung. Hiji lalaki make iket, nangtung teu jauh ti domba, “ngawasitan” sato nu keur diadu.
Nu lalajona, aya nu nangtung di lapang, aya oge nu naringali ti luhureun panggung –nu moal salah para gegeden Walanda jeung Bandung.
“Alun-alun baheula sok dipake tempat mintonkeun kasenian rayat cara seni calung nu ngagunakeun angklung, malah sok dipake tempat ngahukum gantung penjahat,” cek panulis.
Baca Juga: Stasiun Kareta Api Buitenzorg Make Arsitektur Corak Eropa, Ayeuna Kaendahanana Meh Leungit
Kabehdianeukeun, alun-alun Bandung salin rupa. Nu asalna mangrupa lapang nu lega bari taya aling-aling, mimiti robah.
Cek panulis, dina taun 1950-an alun-alun Bandung geus jadi taman. Harita di tengah alun-alun geus dipelak kekembangan.
Taun 1960, alun-alun Bandung geus robah pisan. Harita geus robah jadi taman, lengkep jeung kekembangan dina pot rupa-rupa ukuran.
Baca Juga: Bulan K3 Nasional, Abbas Saleh: Taya Kacilakaan Gawé di UP3 Majalaya
Tapi robahna pisan alun-alun Bandung mah dina taun 1980 sabada alun-alun jadi buruan Mesjid Agung.
Ngan nu matak reugreugna, kaayeunakeun alun-alun Bandung geus “mulang” deui ka asal, jadi lapang lega (najan ngaheureutan) nu di tengah-tengahna lowong taya adegan naon-naon.***
