Network
GALURA.CO.ID –Bulan Mulud nu jaroh ka makam Hariang Kancana di Nusa Gede Situ Lengkong di Desa Panjalu Kecamatan Panjalu Kabupaten Ciamis merul, daratang ti mana-mana. Tapi gapura utama Situ Lengkong ditutup tepi ka awal taun anyar 2024.
Anu rek jaroh ka Nusa Gede, ka makam Hariang Kancana, teu bisa make parahu ti darmaga nu paeunteung-eunteung jeung darmaga di Nusa Gede atawa Nusa Larang. Ti dinya ka gapura Nusa Gede kawilang deukeut, ukur memenitan oge tepi. Ku naon Situ Lengkong tepi ka ditutup?
Pangna ditutup lantaran basisir Situ Lengkong deukeut lawang asup keur direvitalisasi, keur dibebenah, keur diropea, ngarah leuwih pikagenaheun wisatawan nu rek jaroh. Pamarentah Kabupaten Ciamis ngarevitalisasi Situ Lengkong pikeun leuwih ngaronjatkeun wisatawan nu engkena ngaronjatkeun PAD.
Baca Juga: Bulan Mulud Cikahuripan Prabu Hariang Kuning Panjalu Ciamis Beurang Peuting Pinuh ku Nu Marandi
Anu rek ka Nusa Gede saheulaanan asupna ti Hujung Winangun, kira-kira sakilometer ti tempat parkir, beulah kaler. Ti tempat parkir disadiakeun mobil wisata, tepi ka tempat parkir Karamat Hujung Winangun.
Ti tempat parkir Karamat Hujung Winangun laju ka Nusa Pakel, anggangna aya kana 500 meteran. Jalanna geus diplur ku beton, rubakna tilu meteran. Nu rek jaroh masing mawa motor oge teu meunang mawa motor. Kudu leumpang atawa naek ojeg.
Nusa Pakel geus dibebenah ku Kejaksaan Negeri Ciamis. Di dinya aya gazebo keur masamoan, masjid, toilet jeung paranti wudu. Disadiakeun oge darmaga keur paparuhuan, nu rek jaroh ka Nusa Gede naek parahuna ti Nusa Pakel.
Anu disebut Nusa Pakel teh saenyana ayeuna mah teu luyu jeung ngaranna, teu saperti Nusa Gede. Nusa pakel geus ngahiji jeung daratan, geus jadi pasawahan. Bareto mah Nusa Pakel teh pulo, ngan ku sabab sadimentasi, Nusa Pakel jadi ngahiji jeung daratan.
Baca Juga: Naskah Kuna Titimangsana Taun 1303, Nu Bogana, Urang Cirebon, Neangan nu Bisaeun Narjamaahkeun
Mayar karcis asupna di pos karcis Nusa Pakel. Ka Galura, waktu Galura laha-loho ka dinya Jumaah sore (08/09/2023), patugas nu jaga nyebutkeun harga karcisna aya dua rupa. Mun euweuh kabersihan saurangna Rp8.000,- ari aya kabersihan mah Rp8.500,-.
Maksud aya kabersihan teh lamun wisatawan ka Nusa Pakelna rek botram atawa ngagelar acara nu tangtu sanggeusna perlu diberesihan. Tah, keur kabersihanana, saurangna mayar Rp500,-.
Pikeun nu rek jaroh ka Nusa Gede, ditutupna lawang utama Situ Lengkong teh, matak ngabarabekeun. Perlu ngaluarkeun waragad deui, salian mayar karcis jeung nyewa parahu.
Dina bulan Mulud nu rek jaroh teh loba pisan. Tangtu wae mobil wisatana moal mahi hiji mah. Masing leuwih hiji oge, jalanna ngan asup samobileun. Moal bisa perewis, tambah deui tempar parkir Hujung Winangun henteu lega.
Sangkan nu rek jaroh teu jauh teuing leumpangna, beus wisata bisa eureunna di sisi Masjid Raya Panjalu. Sabada nurunkeun panumpang, beus diparkir di tempat parkir, tonggoheun gapura utama Situ Lengkong.***
