Network
GALURA.CO.ID - Calon presiden (capres) nomer 1 Anies Baswedan meredih ka pers sangkan ulah aya warta (berita) anu provokatif lantaran bisa nguatkeun polarisasi di masarakat, utamana dina mangsa kampanyeu mapag Pemilu 2024.
"Berita-berita provokatif ngan bakal nguntungkeun buzzer turta nguatkeun polarisasi di masarakat. Jadi, tong méré feeding (dahareun, -Red) ka buzzer," ceuk Anies Baswedan dina acara “Dialog Capres 2024 bersama Persatuan Wartawan Indonesia (PWI)” di kantor PWI Pusat, Gedung Dewan Pers, Jalan Kebon Sirih, Jakarta, Jumaah (1/12/23).
Saméméh dialog jeung capres Anies Baswedan, di tempat nu sarua, poé Kemisna (30/11) PWI ngayakeun dialog jeung capres Ganjar Pranowo.
Anis Baswedan nétélakeun, nalika jadi Gubernur DKI Jakarta periode 2017-2022, dirina teu kungsi ngamangpaatkeun buzzer pikeun ngalawan kritik masarakat. Malah, cenah, minangka pejabat nagara, Anies sok muka rohang kritik pikeun masarakat.
Baca Juga: Dialog Capres 2024 jeung PWI Pusat, Ganjar Pranowo: ‘Pers Kiwari keur Teu Sehat’
Mun seug engké ditakdirkeun ogé kapilih jadi presiden, cenah, Anies Baswedan jangji moal rék ngagunakeun buzzer. Inyana meredih ka pers sangkan ngalaksanakeun fungsi kontrol sosial jeung ngadidik masarakat ku cara muka rohang kritik, sarta méré rohang nu sarua keur pamaréntah pikeun ngajawab éta kritik ku data jeung fakta anu aya.
“Cenah mah pers téh kedah netral tur obyektif. Tapi, dina sababaraha hal, contona ningal kajahatan, jelas pisan kedah mihak dina merangan kajahatan,” ceuk Anies.
Sajeroning kitu, Ketua Umum PWI Pusat, Hendry Ch Bangun, nétélakeun, yén acara “Dialog Capres 2024 bersama Persatuan Wartawan Indonesia (PWI)” téh diayakeun minangka bagian tina miéling Hari Pers Nasional (HPN) 2024. Puncak acara HPN baris lumangsung 9 Februari 2024 di Taman Impian Jaya Ancol, Jakarta.***
Baca Juga: 4 Tahun PRMN, galura.co.id: Ekosistem PRMN Leuwih Hirup bari jeung Huripna
