Network
GALURA.CO.ID -Pikiran Rakyat Media Network (PRMN) dina 2 Desember 2023 milangkala nu kaopat. Minangka ekosistem media online nu mibanda jaringan panglobana di Indonesia, Pikiran Rakyat Media Network terus-terusan kolaborasi sarta muka kasempatan keur wartawan-wartawan di daerah keur ngokolakeun bisnis mediana dina wadah Pikiran-Rakyat.com.
Kawilang geus lila Pikiran Rakyat ngatransformasi ti media lokal di wewengkon Jawa Barat jadi media nasional kalayan jaringan kamitraan panglegana nu sumebar di 34 provinsi di Indonesia. Tepi ka danget ieu leuwih ti 200 jaringan media aktif dina ekosistem PRMN.
Media online galura.co.id salasahiji bagean tina ekosistem PRMN, mimiti ngagabung awal Januari 2023. Udagan diapungkeunana galura.co.id keur leuwih ngalegaan ambahan nu hayang maca media bahasa Sunda jeung nu hayang neuleuman budaya Sunda.
Kawijakan redaksional galura.co.id leuwih neueulkeun kana budaya Sunda: sejarah, kasenian, sastra, atikan, jeung floklor. Najan kitu lain hartina galura.co.id teu ngabahas sacara langsung kaayaan sosial, pulitik, ekonomi, boh lokal, regional, boh nasional. Ngan galura.co.id ngabahasna maka kacamata budaya Sunda.
Media online galura.co.id oge udaganana keur leuwih ngeuyeuban Surat Kabar Mingguan (SKM) Galura nu ti taun 1975 jadi bagean ti PT Pikiran Rakyat Bandung. Anu naratas Pikiran Rakyat nerbitkeun SKM Galura teh: Sakti Alamsyah, Atang Ruswita, Parman Djajadiredja jeung Hilman BS.
Boh SKM Galura boh galura.co.id sarua midangkeun warta-wartana dina bahasa daerah, bahasa Sunda. Di antara media jejaring di Indonesia ukur PRMN nu mibanda mitra media online bahasa daerah. Dipiharep ku ngagabungna jeung PRMN, galura.co.id ngalantarankeun PRMN leuwih hirup bari jeung huripna sarta mibanda ajen nu onjoy batan media jejarang sejenna di nagara urang, malah di dunya internasional.
Kantor redaksi galura.co.id di Jalan Asia Afrika No. 77 Bandung, sasuhunan jeung redaksi Harian Pikiran Rakyat, ngahiji jeung kantor redaksi SKM Galura. Sapopoena mah redaktur dina ngokolakeun galura.co.id henteu di kantor, tapi di lapangan sakalian keur neangan bahan keur SKM Galura.
Sejarah Pikiran-Rakyat.com jadi Induk PRMN
Nyaritakeun PRMN, teu bisa dileupaskeun tina Pikiran-Rakyat.com minangka situs induk jeung imah utama keur jejaring media nu aya di jerona. Bulan September 1996, Pikiran Rakyat ngapungkeun situ warta www.pikiran-rakyat.com, keur ngarespon kamekaran teknologi informasi dina lebah dieu internet nu mimiti mucunghul taun 1990-an.
Harita mah media sejenna di Indonesia umumna masih jongjon ngokolakeun edisi cetak. Tapi Pikiran Rakyat mah geus sadar kumaha pentingna kamekaran teknologi internet nu terus mekar tepi ka danget ieu pisan. Pikiran Rakyat teu mandang kamekaran internet hiji ancaman, tapi peluang.
