Network
GALURA.CO.ID –Sidang praperadilan nu diajukeun ku tersangka INA, Kepala Badan Kepegawaian Pengembangan Sumber Daya Manusia (BKPSDM) nu ditahan ku Kejati Jabar alatan diduga kalibet dina kasus gratifikasi pangwangunan Pasar Sindangkasih Cigasong digelar Salasa, 16 April 2024, di Pengadilan Negeri (PN) Bandung Kelas 1A Khusus.
Dina emprona sidang batal atawa diundur. Alatanana, pihak nu diadukeun, Kejati Jabar teu datang. Tim penasehat hukum INA, Adria Indra Cahyadi, mah geus siap. Ngan 7 jaksa ti Kejati Jabar teu datang.
Tina kituna PN Bandung ngajadwalkeun deui sidang. “Dijadwalkeun sidang dinten Salasa 23 April 2024, ,” ceuk Hakim PN Bandung, M Syrif.
Kuasa hukum Ina, Adria Indra Cahyadi, kuciwaeun teu datangna pihak termohon, Kejati Jabar dipersidangan praperadilan. Inyana nyebutkeun praperadilan hak tersangka.
“Sim kuring katut rengrengan miharep Kejati Jabar tiasa hadir luyu waktos anu ditangtoskeun hakim, supados materi praperadilan tiasa diungkabkeun sacara gamblang,” ceuk Adria Indra Cahyadi.
Ngeunaan teu datangna pihak Kejati Jabar dina persidangan, wartawan rek konfirmasi ka Kasi Penkum Kejati Jabar Nur Sricahyawijaya, ngan hanjakal teu hasil, sabab Nur cenah keur euweuh di tempat.*** Ayank R Sambara
