GALURA.CO.ID -Najan kiwari keur usumna medial sosial, tapi Badan Pengawas Pemilihan Umum (Bawaslu) Majalengka mandang media massa mampu ngahasilkeun pemilu nu kualitasna hade. Tinggal kumaha strategi dina nyusun wartana.
Ketua Bawaslu Majalengka, Dede Rosada, S.Pd., netelakeun media teh sarana nu jadi kabutuhan dasar kamotekaran kahirupan, kaasup dina lebah demokrasi.
Anu jadi pasualan: kumaha nempatkeun media sacara efektif, efisien, profesional pikeun medalkeun kualitas demokrasi nu saluyu jeung kabutuhan sarta kahayang masarakat. "Ku kituna dina hal ieu media ulah dijantenkeun alat kampanyeu teu pararuguh," ceuk Dede.
Baca Juga: Dialog Capres 2024 jeung PWI, Anies Baswedan: ‘Tong Méré Dahareun ka Buzzer’
Disebutkeun Dede, sanajan aya sarana edukasi, publikasi saperti baliho nu ngagunakeum waragad kawilang badag, media massa dipeunteun leuwih efektif sarta ngan ngabutuhkeun waragad nu leutik tur kahontal ku sakumna segmen. "Babakuna masarakat nu janten pemilih dina Pemilu 2024," ceuk Dede.
Pentingna peran media di satiap tahapan Pemilu 2024, Bawaslu Kabupaten Majalengka gelar silaturahmi jeung awak media. Gelaran dilaksanakeun di Kantor Bawaslu Kabupaten Majalengka, Jalan Letkol Abdul Gani No.7 Majalengka Kulon. Jumaah, (22/12/23) beurang.
Di hareupeun sakumna jurnalis nu aya dina auban sababaraha organisasi wartawan, Dede nepikeun sababaraha hal penting. Di antarana ngeunaan pengawasan tahapan-tahapan Pemilu 2024 katut hasil gawe Bawaslu Majalengka.
Disebutkeun Dede, kiwari tahapan kampanyeu geus lumangsung 25 poe. Ceuk Dede, kacatet 404 kali kampanyeu geus dilaksankeun ku sakumna pamilon pemilu nu sumebar di 26 Kecamatan sakabupaten Majalengka. Kakara aya hiji laporan dugaan pelanggaran kampanyeu, nyaeta diruksakna Alat Peraga Kampanye (APK) di Kecamatan Jatitujuh.
Baca Juga: Harepan Muhaimin Marengan Anies di Pilpres 2024 Disaluyuan ku PKS Tinekanan
Dina kasempetan eta oge, Ketua Bawaslu nyebutkeun aya hal nu teu eleh penting: pengawasan pemutahiran data pemilih. “Kiwari nuju pemutahiran Daftar Pemilih Tambahan (DPT),” ceuk Dede. Daftar pemilih tambahan teh pemilih nu bakal pindah milih.
Kiwari di Kabupaten Majalengka anyar kadata sajumlah 1.642 urang daftar pemilih tambahan. Anu asup aya 928 urang, nu kaluar 713 urang. “Aya tilu alesan, ku naon ngalih milih. Nu kahiji, ku margi ngalih domisili, kadua janten tahanan di Lembaga Pemasyarakatan (LP), nu katilu ku margi galih didamel,” ceuk Dede Rosada.
Salian ti eta, aya Daftar Pemilih Khusus (DPK) di luar DPT lobana 29 urang. DPK dina milih ngagunakeun KTP. Masih ceuk Dede, eta data aya kemungkinan bisa nambahan. Pangalaman dina pemilu samemehna jumlah DPK ampir 9 rebu urang. Salian ngajelaskeun ngeunaan pengawasan tahapan kampanyeu jeung pemuktahiran data, Dede netelakeun ngeunaan pengawasan tahapan logistik.
“Nembe rengse tadi siang kinten-kinten tabuh 11 nalingakeun dongkapna logistik surat suara kangge pemilu DPRD Kabupaten Majalengka,” ceuk Dede deui nerangkeun. Lobana surat suara keur DPRD Kabupaten Majalengka teh 1.020.654 surat suara. Kaasup surat suara cadangan, 21.897," ceuk Dede.*** Ayank R Sambara