Network
GALURA- Panitia Pengawas Pemilu (Panwaslu) Kecamatan Ciniru, Kabupaten Kuningan, geus ngalakonan koordinasi reujeung patugas, instansi jeung institusi sejen patali pangawasan logistik Pemilu 2024.
Ketua Panwaslu Kecamatan Ciniru, Ade Wahyudi, nyebutkeun dina ngalakonan pangawasan logistik di Kecamatan Ciniru nyaluyukeun reujeung kondisi alam daerah.
Eta raket patalina wewengkon Kecamatan Ciniru kaasup salasahiji daerah rawan bencana, hususna urug, di Kabupaten Kuningan.
Baca Juga: Jurus Panwascam Ciniru Dina Nyanghareupan Pemilu
Ku sabab kitu, ceuk Ade, dina ngalakonan pangawasan logistik teh nyaluyukeun kana kondisi daerah rawan bencana alam tea.
Aya sababaraha desa di Kecamatan Ciniru anu kaasup rawan bencana ti antarana wae Desa Gunungmanik jeung Desa Pinara.
“Sim kuring saparakanca parantos ngalakonan koordinasi hususna sareng PPK (panitia pelaksana kecamatan), dina metakeun potensi karawanan logistik di desa-desa rawan bencana,” ceuk Ade.
Ceuk Ade, satuluyna, eta teh pikeun nunjel kalancaran dina sual ngadistribusikeun logistik pemilu. Ulah nepika telat, kaganggu ku hal di luar teknis dina mangsa ngadistribusikeun logistik.
Ku cara metakeun potensi rawan logistik nu ngait kana sual kondisi alam jeung cuaca kiwari nepika bulan Pebruari 2024 anu bakal datang, Panwaslu Kecamatan Ciniru geus miboga gambaran naon anu kudu dilakonan.
Pikeun nyinglar hal anu baris ngaganggu kana proses Pemilu, salasahijina metakeun akses jalan dina ngadistribusikeun logistik saupama kajadian bencana alam.
