GALURA - Persib Maung Bandung, kleup kameumeut urang Jawa Barat, kudu mayar dengda deui ka PSSI. Dengda nu kudu dibayarkeun Persib teh Rp 50 juta.
Ari gara-garana, basa Persib Bandung adu hareupan jeung PSS Sleman Ahad Minggu 5 Peruari 2023 nu geus kaliwat, aya oknum bobotoh nu maledog suporter PSS Sleman di tribun kidul Stadion Gelora Bandung Lautan Api (GBLA).
"Nyoko kana Pasal 70 Ayat 1, Ayat 4 jeung lampiran 1 Nomer 5 Kode Disiplin PSSI Taun 2018, kleup Persib kudu mayar dengda nu agengna Rp 50.000.000,- (lima puluh juta rupiah)," kitu cek PSSI dina suratna.
Baca Juga: Persib Nyiapkeun 22 Pamaen pikeun Nyanghareupan Bali United di Maguwoharjo, Ieu Berendelanana
Samemeh ngaluarkeun eta hukuman, Komite Disiplin PSSI ngayakeun heula sidang dina poe Salasa 7 Pebruari 2023. Sidangna diluluguan langsung ku Ketua Komdis PSSI, Irjen Pol (Purn) Drs. Erwin TPL Tobing.
Anapon nu disidangkeunana, kalakuan oknum bobotoh dina laga antara Persib vs PSS Slemat harita.
Nurutkeun laporan anu katampa ku PSSI, dina eta pertandingan, oknum bobotoh ngahaja maledogkeun botol cai mineral ka palebah suporter PSS Sleman di tribun kidul GBLA.
Baca Juga: Ratu Wilhelmina Kawin ka Pangeran Hendrik, Perkebunan Pasirmalang Diduruk