GALURA -Mun ngadenge kecap betrik, pasti urusanana kana usik teunggeul, atawa nyabok ku tonggong ramo leungeun, ngabetrik atawa dibetrik, bisa oge ngiyaskeun usik jurus lir betrik usik, betrik ngaguliksik keusik.
Demi ari ceuk dunya nguseup mah, betrik teh ngaran hiji lauk sagede dua ramo dewasa dirempetkeun.
Ceuk ahli bubu Tegalluar Kabupaten Bandung mah, betrik teh masih keneh seke-seler lauk betok jeung pepetek.
Ngan pedah ukuran betok mah iseud badag ti betrik, ari pepetek mah ipis pisan tepi ka sok jadi heuheureuyan ka jelema lemped ku istilah ipis alahbatan pepetek. Husus betrik, bisa disebutkeun lauk has Ci (Walungan) Keruh.
Cikeruh huluna di Tanjungsari, buntutna atawa ngamuharana di Ci Tarum wewengkon Tegalluar. Nu kakoncara ti beh ditu mula purah mudal caah saban taunna.
Sakalieun Ci Keruh lebleban ka darat, lauk betrik mah rabul blas-blus ka buruan, kolomberan atawa kana sedong-sedong lembur. Ngadon arendogan, saterusna malegar dina waktu singget.
Matak teu aneh, mun pangheulana jadi korban heurap, susug atawa said teh nya kolompok betrik, munasabah pada nyebut oleh-oleh caah. Sok sanajan lauk bawa caah teh lain betrik wae.
Baca Juga: Gunung Galuh Ciamis, Tempat Ngabungbang Bupati Ciamis Jaman Baheula, Ayeuna Dipopohokeun