Network
GALURA.CO.ID -Pikeun ngaraketkeun hubungan dua Nagara, Tim Art in Motion (AiM) Walanda, sawatara waktu kaliwat geus ngayakeun lokakarya intensif di ISBI Bandung, tanggal 19 - 20 Februari 2024. Kagiatan ieu mangrupa awal nu penting pikeun hubungan kreatip jeung budaya anu bakal ngaraketkeun hubungan antara Indonesia jeung Walanda dina taun 2024 jeung 2025.
Tilu urang pengajar (Rob Hammink, Ronald van de Cappelle jeung Quirine van Heeren) ngahajakeun datang ti Walanda pikeun nyileman mangsa bihari, kiwari, jeung nu utama nyawang mangsa hareup kadua nagara, babarengan jeung para mahasiswa akademi seni Indonesia, salah sahijina jeung mahasiswa ISBI Bandung.
Ku sagala pangaweruhna, para mahasiswa bakal mimiti digawe jeung nyiptakeun hiji karya seni anu baris diniley ku juri dina tanggal 8 Maret 2024. Pinunjulna bakal meunang hadiah mangrupa uang saku bekel miang ka Walanda bulan September 2024 nepi ka November 2024. Para mahasiswa di Nagara Kincir Angin bakal jadi duta budaya jeung bakal reureujeungan nyieun karya seni jeung mahasiswa Walanda. Karya seni anu bakal jadi simbul nu kuat pikeun mangsa hareup anu raharja.
Baca Juga: Kinanti, Olahraga jeung Seni Ibing Penca Silat
Rob Hammink, panaratas AiM teh penulis (di antarana novel Jodoh), reporter senior internasional De Telegraaf jeung kungsi maen dina film Bumi Manusia karya Pramoedya Ananta Toer. Hammink kaget nilik sikep Indonesia jeung Walanda dina nyurahan mangsa heubeul nu sarua.
“Indonesia teh nagara ngora seger keneh anu keur bagerak maju kacida cepetna . Nagara anu keur sumedeng mekar. Standar hirup ge undak. Di Walanda, nilik deui ka mangsa bihari boga tujuan nu mandiri. Maranehna anu nyawang ka tukang ku hideung-bodas, moal ningali warna-warna dina mangsa hareupna. Seni teh cara ampuh keur nyieun pernyataan ku cara nu lemes,” kitu ceuk Hammink.
Kick-off AiM bakal dimimitian awal tahun ieu di Bandung, sarta AiM bakal diluncurkan di sakuliah Indonesia, mimiti ti Aceh nepi Papua anu bakal lumangsung nepi ka taun 2025, nalika Indonesia mileing 80 taun kamerdekaanana.
Proyek seni ieu dirojong ku Atase Pendidikan dan Kebudayaan Kedutaan Besar Republik Indonesia di Den Haag, ISBI Bandung, BKS PTSI, jeung Erasmus House di Jakarta.
Baca Juga: Seni Beluk nu Ngaburahol
Wakil Rektor Bidang Perencanaan, Sistem Informasi, dan Kerja Sama ISBI Bandung, Indra Ridwan, S.Sos., M.Sn.,M.A., Ph.D, negeskeun deui ka wartawan, tujuan hubungan Indonesia- Walanda ieu geus kacida lilana. Ku kituna perlu dipikiran hubungan pikahareupeunana. Diantarana ku jalan nyieun hiji program anu bisa ngaraketkeun hubungan dua nagara, saling bantu, jeung nguntungkeun, tapi ngaliwatan seni.
Ku kitina ISBI Bandung minangka salah sahiji paguron luhur seni di Indonesia anu pangheulana diajak gawe rukun, ngajurung para mahasiswana ti rupa-rupa prodi/jurusan anu aya di ISBI Bandung sangkan milu kana kagiatan kompetisi ieu. Malah bisa wae ka hareupna kompetisi gawe rukun jeung Art in Motion (AiM) Walanda ieu bakal dimekarkeun deui, gawe rukun jeung sakabeh universitas di Indonesia anu aya fakultas senina.
Saheulaanan mah aya 9 perguruan tinggi seni di Indonesia anu baris diilukeun tapi anu berpartisipasi ukur 3 , diantarana ISBI Bandung, ISI Surakarta jeung ISBI Aceh.
“Kanggo sementawis mah taun ieu kagiatan bakal digelar di ISBI Bandung, tah kanggo taun payun( 2025) tiasa wae di perguruan tinggi sanesana, tiasa di ISI Denpasar, ISI Surakarta, ISBI Aceh samalah tiasa wae di ISBI Papua pami kenging sponsor nu hade mah. Saluyu sareng anu dusaurkeun ku panaratasna Rob Hammink, upami hasilna nyugemakeun, kapayunna kagiatan ieu baris langkung dimekarkeun deui. Tiasa ku mangrupi konser seni reujeung atanapi ngayakeun konferensi reujeung,” kitu ceuk Indra.***Asep GP
